ਜਸਵੰਤ ਸਿੰਘ ਥਿੰਦ/ ਸੰਜੀਵ ਹਾਂਡਾ
ਮਮਦੋਟ/ਫ਼ਿਰੋਜ਼ਪੁਰ, 28 ਅਪਰੈਲ
ਥਾਣਾ ਮਮਦੋਟ ਅਧੀਨ ਪਿੰਡ ਟਿੱਬੀ ਕਲਾਂ ਦੀ ਦਾਣਾ ਮੰਡੀ ਵਿਚ ਲੇਬਰ ਕਾਰਨ ਦੋ ਆੜ੍ਹਤੀਆਂ ਵਿਚ ਹੋਏ ਝਗੜੇ ਦੌਰਾਨ ਚੱਲੀ ਗੋਲੀ ਵਿਚ ਇਕ ਵਿਅਕਤੀ ਦੀ ਮੌਤ ਹੋ ਗਈ ਤੇ ਦੂਜਾ ਗੰਭੀਰ ਜ਼ਖ਼ਮੀ ਹੋ ਗਿਆ। ਟਿੱਬੀ ਖੁਰਦ ਮੰਡੀ ਵਿੱਚ ਦੋ ਆੜ੍ਹਤੀਆਂ ਵਿਚ ਲੇਬਰ ਨੂੰ ਲੈ ਕੇ ਬੀਤੇ ਦਿਨ ਤਕਰਾਰ ਹੋ ਗਿਆ ਸੀ, ਜਿਸ ਸਬੰਧੀ ਅੱਜ ਝਗੜੇ ਨੂੰ ਨਿਪਟਾਉਣ ਲਈ ਪੰਚਾਇਤ ਕੀਤੀ, ਜਿਥੇ ਤਕਰਾਰ ਵਧਣ ’ਤੇ ਇਕ ਧਿਰ ਵੱਲੋਂ ਦੂਜੀ ’ਤੇ ਸਿਰ ਤੇ ਫਾਇਰਿੰਗ ਕਰ ਦਿੱਤੀ ਗਈ। ਇਸ ਦੀ ਜਵਾਬੀ ਕਾਰਵਾਈ ਵਿੱਚ ਦੂਜੀ ਧਿਰ ਵੱਲੋਂ ਕੀਤੀ ਫਾਇਰਿੰਗ ਵਿੱਚ ਦੋਵਾਂ ਧਿਰਾਂ ਦਾ ਇਕ-ਇੱਕ ਵਿਅਕਤੀ ਗੰਭੀਰ ਜ਼ਖ਼ਮੀ ਹੋ ਗਿਆ, ਜਿਨ੍ਹਾਂ ਨੂੰ ਫਿਰੋਜ਼ਪੁਰ ਦੇ ਪ੍ਰਾਈਵੇਟ ਹਸਪਤਾਲ ਚ ਦਾਖ਼ਲ ਕਰਾਇਆ ਗਿਆ, ਜਿੱਥੇ ਇੱਕ ਧਿਰ ਦੇ ਵਿਅਕਤੀ ਕਿਰਪਾਲ ਸਿੰਘ ਪੁੱਤਰ ਪਿਆਰਾ ਸਿੰਘ ਪਿੰਡ ਜੋਧਪੁਰ ਦੀ ਮੌਤ ਹੋ ਗਈ ਹੈ। ਦੂਜੀ ਧਿਰ ਵਿਚੋਂ ਆੜ੍ਹਤੀਏ ਸੂਰਤ ਸਿੰਘ ਦਾ ਪੁੱਤਰ ਗੁਲਸ਼ਨ ਵੀ ਗੋਲੀ ਵੱਜਣ ਨਾਲ ਗੰਭੀਰ ਰੂਪ ਵਿਚ ਜ਼ਖਮੀ ਹੋਇਆ ਹੈ।
