ਜਸਬੀਰ ਸਿੰਘ ਸ਼ੇਤਰਾ
ਜਗਰਾਉਂ, 5 ਮਈ
ਜਗਰਾਉਂ ਦੀ ਬੁੱਕਲ ਵਿੱਚ ਵੱਸਦੇ ਪਿੰਡ ਮਲਕ ਦੇ ਸਾਧਾਰਨ ਕਿਸਾਨ ਪਰਿਵਾਰ ਵਿੱਚੋਂ ਉੱਠ ਕੇ ਪੰਜਾਬੀ ਫ਼ਿਲਮਾਂ ਰਾਹੀਂ ਦੇਸ਼ ਦੁਨੀਆਂ ਵਿੱਚ ਨਾਂ ਕਮਾਉਣ ਵਾਲੇ ਫ਼ਿਲਮਸਾਜ਼-ਅਦਾਕਾਰ ਸੁਖਜਿੰਦਰ ਸ਼ੇਰਾ ਦਾ ਦੇਹਾਂਤ ਹੋ ਗਿਆ ਹੈ। ਮਰਹੂਮ ਵਰਿੰਦਰ ਦੀ ਫ਼ਿਲਮ ‘ਜੱਟ ਤੇ ਜ਼ਮੀਨ’ ਰਾਹੀਂ ਪਛਾਣ ਬਣਾਉਣ ਵਾਲੇ ਸ਼ੇਰਾ ਨੇ ਕੀਨੀਆ ’ਚ ਆਖਰੀ ਸਾਹ ਲਏ। ਉਸ ਦਾ ਪਰਿਵਾਰ ਦੇਹ ਭਾਰਤ ਲਿਆਉਣ ਲਈ ਚਾਰਾਜੋਈ ਕਰ ਰਿਹਾ ਹੈ। ਮ੍ਰਿਤਕ ਦੇ ਭਰਾ ਸੁਖਵਿੰਦਰ ਸਿੰਘ ਨੇ ਦੱਸਿਆ ਕਿ ਸੁਖਜਿੰਦਰ ਸ਼ੇਰਾ ਪਿਛਲੇ ਮਹੀਨੇ ਆਪਣੇ ਦੋਸਤ ਕੋਲ ਕੀਨੀਆ ਗਿਆ ਸੀ। ਉਥੇ ਦੋ ਕੁ ਹਫਤੇ ਪਹਿਲਾਂ ਉਸ ਨੂੰ ਬੁਖਾਰ ਹੋਇਆ। ਬੁਖਾਰ ਵਿਗੜ ਜਾਣ ’ਤੇ ਉਸ ਨੂੰ ਕੀਨੀਆ ਦੇ ਹਸਪਤਾਲ ’ਚ ਭਰਤੀ ਕਰਵਾਇਆ ਗਿਆ, ਪਰ ਬੀਤੀ ਰਾਤ ਨਿਮੋਨੀਆ ਕਰਕੇ ਸ਼ੇਰਾ ਦਾ ਦੇਹਾਂਤ ਹੋ ਗਿਆ।
