ਨਿੱਜੀ ਪੱਤਰ ਪ੍ਰੇਰਕ
ਫ਼ਰੀਦਕੋਟ, 16 ਜੂਨ
ਜ਼ਿਲ੍ਹਾ ਪੁਲੀਸ ਨੇ ਗੈਂਗਸਟਰਾਂ ਵੱਲੋਂ ਮੰਗੀਆਂ ਫਿਰੌਤੀਆਂ ਉਗਰਾਹੁਣ ਵਾਲੇ ਨੌਜਵਾਨ ਨੂੰ ਕਾਬੂ ਕੀਤਾ ਹੈ। ਪੁਲੀਸ ਨੇ ਦੱਸਿਆ ਕਿ ਗੁਪਤ ਸੂਚਨਾ ਦੇ ਆਧਾਰ ’ਤੇ ਫਿਰੋਜ਼ਪੁਰ ਦੇ ਨਵਦੀਪ ਸਿੰਘ ਨੂੰ ਪਿੰਡ ਪੰਜਗਰਾਈਂ ਕੋਲੋਂ ਦੇਸੀ ਪਿਸਤੌਲ ਅਤੇ ਕਾਰਤੂਸਾਂ ਸਮੇਤ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਪੁੱਛਗਿੱਛ ਦੌਰਾਨ ਨਵਦੀਪ ਸਿੰਘ ਨੇ ਮੰਨਿਆ ਕਿ ਉਸ ਨੇ ਆਪਣੇ ਸਾਥੀ ਮੱਘਰ ਸਿੰਘ ਅਤੇ ਬੱਬੀ ਸਿੰਘ ਨਾਲ ਮਿਲ ਕੇ ਬਾਘਾਪੁਰਾਣਾ ਦੇ ਇਕ ਗਾਰਮੈਂਟਸ ਸਟੋਰ ਦੇ ਬਾਹਰ ਫਾਇਰਿੰਗ ਕੀਤੀ ਸੀ। ਪੁਲੀਸ ਨੇ ਦੱਸਿਆ ਕਿ ਗੈਂਗਸਟਰ ਕਿਰਪਾਲ ਸਿੰਘ ਪਾਲਾ ਨੇ ਕਥਿਤ ਤੌਰ ’ਤੇ ਬਾਘਾਪੁਰਾਣਾ ਦੇ ਸਾਹਿਲ ਗਾਰਮੈਂਟਸ ਸਟੋਰ ਦੇ ਮਾਲਕ ਕੋਲੋਂ 15 ਲੱਖ ਰੁਪਏ ਫਿਰੌਤੀ ਮੰਗੀ ਸੀ। ਨਵਦੀਪ ਸਿੰਘ ਆਪਣੇ ਸਾਥੀਆਂ ਨਾਲ ਫਿਰੌਤੀ ਦੀ ਰਕਮ ਲੈਣ ਗਿਆ ਸੀ ਪਰ ਰਕਮ ਉਸ ਨੂੰ ਨਾ ਮਿਲੀ।
