ਸੁਰਜੀਤ ਮਜਾਰੀ
ਬੰਗਾ, 17 ਜਨਵਰੀ
ਕਿਸਾਨ ਅੰਦੋਲਨ ’ਚ ਭਲਕੇ ਮਨਾਏ ਜਾਣ ਵਾਲੇ ਮਹਿਲਾ ਦਿਵਸ ਸਬੰਧੀ ਕਿਸਾਨ ਔਰਤਾਂ ਦਾ ਜਥਾ ਬੀਬੀ ਗੁਰਬਖਸ਼ ਕੌਰ ਸੰਘਾ ਦੀ ਅਗਵਾਈ ਹੇਠ ਪਿੰਡ-ਪਿੰਡ ਜਾ ਕੇ ਲਾਮਬੰਦੀ ਕਰ ਰਿਹਾ ਹੈ। ਜਥੇ ਵਿੱਚ ਗੁਰਬਖਸ਼ ਕੌਰ ਸੰਘਾ ਨਾਲ ਸੁਰਜੀਤ ਕੌਰ ਵੜੈਚ, ਰਣਜੀਤ ਕੌਰ ਮਹਿਮੂਦਪੁਰ, ਹਰਬੰਸ ਕੌਰ ਦੀਪ, ਬਲਵਿੰਦਰ ਕੌਰ, ਰਾਜਵਿੰਦਰ ਕੌਰ, ਸਾਰਾ ਸਿੱਧੂ ਮੋਹਰੀਆਂ ਵਜੋਂ ਸ਼ਾਮਲ ਹਨ। ਦਿੱਲੀ ਦੇ ਤਖ਼ਤ ਨਾਲ ਆਢਾ ਲਾਈ ਬੈਠੇ ਕਿਸਾਨਾਂ ਦਾ ਹੌਸਲਾ ਵਧਾਉਣ ਵਾਲੀਆਂ ਬੀਬੀਆਂ ਹਾਕਮਾਂ ਨੂੰ ਕਾਂਬਾ ਛੇੜ ਰਹੀਆਂ ਹਨ। ਉਹ ਭਾਸ਼ਣ ਵੀ ਦਿੰਦੀਆਂ ਹਨ ਅਤੇ ਨਾਅਰੇ ਵੀ ਬੁਲੰਦ ਕਰ ਰਹੀਆਂ ਹਨ। ਖੇਤੀਬਾੜੀ ਵੀ ਸੰਭਾਲ ਰਹੀਆਂ ਹਨ ਅਤੇ ਰੋਟੀ-ਟੁੱਕ ਵੀ ਕਰ ਰਹੀਆਂ ਹਨ। ਦਿੱਲੀ ਤਕ ਗੂੰਜ ਪਾਉਣ ਵਾਲੇ ਟਰੈਕਟਰ ਮਾਰਚ ਵੀ ਕੱਢ ਰਹੀਆਂ ਹਨ ਅਤੇ ਕਿਸਾਨ ਯੂਨੀਅਨ ਦਾ ਝੰਡਾ ਫੜ ਕੇ ਮੁਜ਼ਾਹਰਿਆਂ ਦੀ ਅਗਵਾਈ ਵੀ ਕਰ ਰਹੀਆਂ ਹਨ। ਕਿਰਤੀ ਕਿਸਾਨ ਯੂਨੀਅਨ ਦੇ ਇਸਤਰੀ ਵਿੰਗ ਵੱਲੋਂ ਭਲਕੇ ਮਹਿਲਾ ਕਿਸਾਨ ਦਿਵਸ ਮੌਕੇ ਰਿਲਾਇੰਸ ਕੰਪਨੀ ਦੇ ਸੁਪਰ ਸਟੋਰ ਅੱਗੇ ਚੱਲ ਰਹੇ ਧਰਨੇ ਵਾਲੇ ਸਥਾਨ ’ਤੇ ਇਹ ਦਿਨ ਮਨਾਇਆ ਜਾਵੇਗਾ।
