ਪੱਤਰ ਪ੍ਰੇਰਕ
ਸੰਦੌੜ, 25 ਸਤੰਬਰ
ਪੁਲੀਸ ਨੇ 320 ਗ੍ਰਾਮ ਚਿੱਟਾ ਅਤੇ 52 ਹਜ਼ਾਰ ਡਰੱਗ ਮਨੀ ਸਮੇਤ ਦੋ ਔਰਤਾਂ ਸਣੇ ਪੰਜ ਵਿਅਕਤੀਆਂ ਨੂੰ ਕਾਬੂ ਕੀਤਾ ਹੈ। ਡੀਐੱਸਪੀ (ਮਾਲੇਰਕੋਟਲਾ) ਕੁਲਦੀਪ ਸਿੰਘ ਨੇ ਦੱਸਿਆ ਕਿ ਪੁਲੀਸ ਟੀਮ ਨੇ ਕਾਰ ਸਵਾਰ ਵਿਅਕਤੀ ਸੁਰਿੰਦਰਪਾਲ ਸਿੰਘ ਉਰਫ ਸਨੀ ਵਾਸੀ ਸਾਹਨੇਵਾਲ ਰੋਡ ਡੇਹਲੋਂ ਨੂੰ 60 ਗ੍ਰਾਮ ਚਿੱਟਾ ਅਤੇ 52 ਹਜ਼ਾਰ ਰੁਪਏ ਦੀ ਡਰੱਗ ਮਨੀ ਨਾਲ ਕਾਬੂ ਕੀਤਾ ਗਿਆ ਹੈ। ਮੁਲਜ਼ਮ ਸੁਰਿੰਦਰਪਾਲ ਸਿੰਘ ਕੋਲੋਂ ਕੀਤੀ ਤਫਤੀਸ਼ ਦੌਰਾਨ ਮਾਮਲੇ ਵਿੱਚ ਸੰਜੀਵ ਕੁਮਾਰ ਸੰਜੂ ਵਾਸੀ ਕੁਠੇੜਾ ਜੱਸਵਾਲਾ, ਵਰਿੰਦਰ ਸਿੰਘ ਸੋਨੂੰ ਵਾਸੀ ਜਲੰਧਰ, ਗੁਰਪ੍ਰੀਤ ਕੌਰ, ਪੁਸ਼ਪਿੰਦਰ ਸਿੰਘ ਦੋਵੇਂ ਵਾਸੀ ਰਾਮਾ ਮੰਡੀ ਜਲੰਧਰ ਸਮੇਤ ਇਕ ਨਾਮਲੂਮ ਔਰਤ ਨੂੰ ਨਾਮਜ਼ਦ ਕੀਤਾ ਗਿਆ। ਪੁਲੀਸ ਨੇ ਸੰਜੀਵ ਕੁਮਾਰ ਸੰਜੂ ਤੇ ਵਰਿੰਦਰ ਸਿੰਘ ਸੋਨੂੰ ਨੂੰ ਜਲੰਧਰ ਕੋਲੋਂ ਗ੍ਰਿਫਤਾਰ ਕੀਤਾ ਅਤੇ ਸੰਜੂ ਦੀ ਨਿਸ਼ਾਨਦੇਹੀ ’ਤੇ ਉਸ ਦੇ ਘਰੋਂ 260 ਗ੍ਰਾਮ ਚਿੱਟਾ ਬਰਾਮਦ ਕੀਤਾ ਗਿਆ।
