ਸ਼ੇਰਪੁਰ: ਲੋਕ ਨਿਰਮਾਣ ਵਿਭਾਗ ’ਚੋਂ ਪਿਛਲੇ ਵਰ੍ਹੇ ਸੇਵਾਮੁਕਤ ਹੋਏ ਐੱਸਡੀਓ ਭੁਪਿੰਦਰ ਸਿੰਘ ਚਹਿਲ (59) ਦਾ ਅੱਜ ਦੇਹਾਂਤ ਹੋ ਗਿਆ, ਜਿਨ੍ਹਾਂ ਦਾ ਅੰਤਿਮ ਸਸਕਾਰ ਉਨ੍ਹਾਂ ਦੇ ਜ਼ੱਦੀ ਪਿੰਡ ਘਨੌਰੀ ਕਲਾਂ ਵਿੱਚ ਕੀਤਾ ਗਿਆ। ਐੱਸਐੱਚਓ ਭਾਦਸੋਂ ਅਮ੍ਰਿਤਵੀਰ ਸਿੰਘ ਤੇ ਐਸਡੀਓ ਪਬਲਿਕ ਹੈਲਥ ਅਮ੍ਰਿਤਸਵਰਾਜ ਸਿੰਘ ਦੇ ਪਿਤਾ ਭੁਪਿੰਦਰ ਸਿੰਘ ਚਹਿਲ ਗੁਰਦਿਆਂ ਦੀ ਬਿਮਾਰੀ ਤੋਂ ਪੀੜਤ ਸਨ। ਉਨ੍ਹਾਂ ਦੇ ਭਰਾ ਬਲਵੰਤ ਸਿੰਘ ਨੇ ਆਪਣਾ ਗੁਰਦਾ ਵੀ ਦਿੱਤਾ ਸੀ। ਉਨ੍ਹਾਂ ਦੇ ਭਰਾਵਾਂ ਮਾਸਟਰ ਬਲਦੇਵ ਸਿੰਘ ਅਤੇ ਮਾਸਟਰ ਕੁਲਵੰਤ ਸਿੰਘ ਹੁਰਾਂ ਨੇ ਬਹੁਤ ਭੱਜ-ਨੱਠ ਕੀਤੀ ਪਰ ਉਹ ਸਿਹਤਯਾਬ ਨਾ ਹੋ ਸਕੇ। ਉਨ੍ਹਾਂ ਦੇ ਅੰਤਿਮ ਸਸਕਾਰ ਦੌਰਾਨ ਕੈਬਨਿਟ ਮੰਤਰੀ ਸਾਧੂ ਸਿੰਘ ਧਰਮਸਰੋਤ ਦੇ ਨਿੱਜੀ ਸਹਾਇਕ ਵਿਕਰਮ ਸਿੰਘ ਭੋਲਾ, ਹੰਸ ਰਾਜ ਮਸਤਾਨਾ, ਮਹੰਤ ਹਰਵਿੰਦਰ ਖਨੌੜਾ, ਮਨਪ੍ਰੀਤ ਸਿੰਘੋਂ, ਨਗਰ ਕੌਂਸਲ ਭਾਦਸੋਂ ਦੇ ਪ੍ਰਧਾਨ ਚੁੰਨੀ ਲਾਲ, ਡੀਐੱਸਪੀ ਨਾਭਾ ਰਾਜੇਸ਼ ਛਿੱਬਰ, ਰਣਜੀਤ ਸਿੰਘ ਬਹਿਣੀਵਾਲ, ਐੱਸਐੱਚਓ ਸੁਖਵਿੰਦਰ ਸਿੰਘ, ਕੇਸਰ ਸਿੰਘ ਬੁਗਰਾ, ਮਾਸਟਰ ਹਰਬੰਸ ਸਿੰਘ ਸ਼ੇਰਪੁਰ ਤੇ ਇੰਦਰਜੀਤ ਸਿੰਘ ਘਨੌਰੀ ਨੇ ਪਰਿਵਾਰ ਨਾਲ ਦੁੱਖ ਸਾਂਝਾ ਕੀਤਾ। -ਪੱਤਰ ਪ੍ਰੇਰਕ
ਸਬੰਧਿਤ ਖ਼ਬਰਾਂ
