ਰਮੇਸ਼ ਭਾਰਦਵਾਜ
ਲਹਿਰਾਗਾਗਾ, 25 ਜੁਲਾਈ
ਆਮ ਆਦਮੀ ਪਾਰਟੀ ਦੇ ਹਲਕਾ ਲਹਿਰਾਗਾਗਾ ਦੇ ਹਲਕਾ ਇੰਚਾਰਜ ਜਸਵੀਰ ਕੁਦਨੀ ਨੇ ਅੱਜ ਨੇੜਲੇ ਪਿੰਡ ਬੱਲਰਾਂ ਦੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਮਾਰਟ ਸਕੂਲ ਦਾ ਦੌਰਾ ਕੀਤਾ ਤਾਂ ਪੰਜਾਬ ਸਰਕਾਰ ਦੇ ਸਮਾਰਟ ਸਕੂਲ ਦੇ ਦਾਅਵਿਆਂ ਦੀ ਪੋਲ ਖੁਲ੍ਹਦੀ ਨਜ਼ਰ ਆਈ ਕਿਉਂਕਿ ਪਿੰਡ ਦੀ ਫਿਰਨੀ ਤੋਂ ਸਕੂਲ ਨੂੰ ਜਾਣ ਵਾਲਾ ਸਾਰਾ ਰਸਤਾ ਪਾਣੀ ਨਾਲ ਭਰਿਆ ਪਿਆ ਸੀ ਬੱਚੇ ਤਾਂ ਦੂਰ ਦੀ ਗੱਲ, ਅਧਿਆਪਕਾਂ ਨੂੰ ਵੀ ਸਕੂਲ ਪਹੁੰਚਣ ਲਈ ਭਾਰੀ ਮੁਸ਼ੱਕਤ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ। ਸ੍ਰੀ ਜਸਵੀਰ ਕੁਦਨੀ ਆਪਣੀ ਟੀਮ ਨਾਲ ਗੋਡੇ ਗੋਡੇ ਪਾਣੀ ਵਿਚ ਲੰਘ ਕੇ ਜਦੋਂ ਸਕੂਲ ਪਹੁੰਚੇ ਤਾਂ ਸਾਰੇ ਅਧਿਆਪਕ ਬਗੈਰ ਬਿਜਲੀ ਤੋਂ ਬੈਠੇ ਸਨ ਕਿਉਂਕਿ ਸਕੂਲ ਦੀ ਬਿਜਲੀ ਬੰਦ ਸੀ। ਇਸ ਮੌਕੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਉਨ੍ਹਾਂ ਪੰਜਾਬ ਸਰਕਾਰ ਉੱਤੇ ਸਵਾਲ ਖੜ੍ਹੇ ਕਰਦਿਆਂ ਕਿਹਾ ਕਿ ਦਿੱਲੀ ਦੇ ਸਕੂਲਾਂ ਦੀ ਨਕਲ ਸਿਰਫ ਦੀਵਾਰਾਂ ਨੂੰ ਰੰਗ ਕਰਵਾਉਣ ਨਾਲ ਨਹੀਂ ਹੁੰਦੀ ਉਸ ਲਈ ਸਕੂਲ ਦੀ ਇਮਾਰਤ ਤੋਂ ਲੈ ਕੇ ਪੜ੍ਹਾਈ ਤੱਕ ਦੇ ਹਰ ਚੀਜ਼ ਵਿਚ ਕੰਮ ਕਰਨ ਦੀ ਲੋੜ ਹੈ। ਉਨ੍ਹਾਂ 2022 ਵਿਚ ਆਮ ਆਦਮੀ ਪਾਰਟੀ ਦੀ ਸਰਕਾਰ ਆਉਣ ’ਤੇ ਸਕੂਲਾਂ ਦਾ ਸਰਬਪੱਖੀ ਵਿਕਾਸ ਕੀਤਾ ਜਾਵੇਗਾ। ਇਸ ਮੌਕੇ ਪਾਰਟੀ ਵਰਕਰ ਹਰਪਾਲ ਸਿੰਘ ਹਰਦੀਪ ਸਿੰਘ ਸਿੱਪੀ ਬੱਲਰਾਂ, ਵਿੱਕੀ ਖਾਨ, ਨਿਰਭੈ ਸਿੰਘ, ਨਛਿੱਤਰ ਗਿਆਨੀ, ਰਾਮ ਸਿੰਘ ਰੇਸ਼ਮ ਸਿੰਘ, ਅਜੈਬ ਸਿੰਘ ਆਦਿ ਹਾਜ਼ਰ ਸਨ।
