‘ਹਿੱਟ-ਦਿ ਫਸਟ ਕੇਸ’ ਨੈੱਟਫਲਿਕਸ ’ਤੇ 28 ਨੂੰ ਹੋਵੇਗੀ ਰਿਲੀਜ਼

ਮੁੰਬਈ: ਰਾਜਕੁਮਾਰ ਰਾਓ ਦੀ ਫਿਲਮ ‘ਹਿੱਟ-ਦਿ ਫਸਟ ਕੇਸ’ ਨੈੱਟਫਲਿਕਸ ’ਤੇ 28 ਅਗਸਤ ਨੂੰ ਰਿਲੀਜ਼ ਹੋਵੇਗੀ। ਜਾਸੂਸੀ ਅਤੇ ਰੁਮਾਂਚ ਨਾਲ ਭਰਪੂਰ ਇਹ ਥ੍ਰਿਲਰ ਫਿਲਮ 15 ਜੁਲਾਈ ਨੂੰ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋਈ ਸੀ। ਇਹ 2020 ਵਿੱਚ ਆਈ ਤੇਲਗੂ ਫ਼ਿਲਮ ‘ਹਿੱਟ’ ਦਾ ਹਿੰਦੀ ਰੀਮੇਕ ਹੈ। ਨੈੱਟਫਲਿਕਸ ਨੇ ਆਪਣੇ ਅਧਿਕਾਰਤ ਟਵਿੱਟਰ ਖਾਤੇ ’ਤੇ ਇਹ ਜਾਣਕਾਰੀ ਸਾਂਝੀ ਕਰਦਿਆਂ ਲਿਖਿਆ, ‘ਇੱਕ ਰਾਜਮਾਰਗ ’ਤੇ ਤਣਾਅਪੂਰਨ ਘਟਨਾ, ਇੱਕ ਗੁਆਚੀ ਹੋਈ ਕਾਰ ਅਤੇ ਲਾਪਤਾ ਮਹਿਲਾ। ‘ਹਿੱਟ-ਦਿ ਫਸਟ ਕੇਸ’ 28 ਅਗਸਤ ਤੋਂ ਦੇਖੋ ਨੈੱਟਫਲਿਕਸ ’ਤੇ।’ ਫਿਲਮ ‘ਹਿੱਟ’ ਇੱਕ ਪੁਲੀਸ ਅਧਿਕਾਰੀ ਦੀ ਕਹਾਣੀ ਹੈ, ਜੋ ਇੱਕ ਲਾਪਤਾ ਔਰਤ ਦੀ ਭਾਲ ਕਰ ਰਿਹਾ ਹੈ। ਪੁਲੀਸ ਅਧਿਕਾਰੀ ਦਾ ਕਿਰਦਾਰ ਰਾਜਕੁਮਾਰ ਰਾਓ ਨੇ ਨਿਭਾਇਆ ਹੈ। ਫਿਲਮ ਦਾ ਨਿਰਦੇਸ਼ਨ ਡਾ. ਸ਼ੈਲੇਸ਼ ਕੋਲਾਨੂ ਨੇ ਕੀਤਾ ਹੈ, ਜਿਨ੍ਹਾਂ ਤੇਲਗੂ ਫਿਲਮ ਦਾ ਨਿਰਦੇਸ਼ਨ ਵੀ ਕੀਤਾ ਸੀ। ਫ਼ਿਲਮ ਵਿੱਚ ਅਦਾਕਾਰਾ ਸਾਨੀਆ ਮਲਹੋਤਰਾ ਵੀ ਹੈ। ਭੂਸ਼ਣ ਕੁਮਾਰ, ਦਿਲ ਰਾਜੂ, ਕ੍ਰਿਸ਼ਨ ਕੁਮਾਰ ਤੇ ਕੁਲਦੀਪ ਰਾਠੌੜ ਫਿਲਮ ਦੇ ਨਿਰਮਾਤਾ ਹਨ। -ਪੀਟੀਆਈ