‘ਮੀਤ’ ਲੜੀਵਾਰ ਦੇ ਸੌ ਐਪੀਸੋਡ ਪੂਰੇ ਹੋਣ ’ਤੇ ਆਸ਼ੀ ਤੇ ਸ਼ਗੁਨ ਵੱਲੋਂ ਦਰਸ਼ਕਾਂ ਦਾ ਧੰਨਵਾਦ

ਮੁੰਬਈ: ਲੜੀਵਾਰ ‘ਮੀਤ’ ਦੇ 100 ਐਪੀਸੋਡ ਪੂਰੇ ਹੋਣ ’ਤੇ ਅਦਾਕਾਰ ਆਸ਼ੀ ਸਿੰਘ ਅਤੇ ਸ਼ਗੁਨ ਪਾਂਡੇ ਨੇ ਦਰਸ਼ਕਾਂ ਅਤੇ ਸ਼ੋਅ ਦੇ ਨਿਰਮਾਤਾਵਾਂ ਦਾ ਧੰਨਵਾਦ ਕੀਤਾ ਹੈ। ਸ਼ੋਅ ਦਾ ਹਿੱਸਾ ਬਣਨ ’ਤੇ ਆਪਣੀ ਖੁਸ਼ੀ ਜ਼ਾਹਰ ਕਰਦਿਆਂ ਆਸ਼ੀ ਸਿੰਘ ਨੇ ਕਿਹਾ, ‘‘ਮੈਨੂੰ ਹਾਲੇ ਵੀ ਵਿਸ਼ਵਾਸ ਨਹੀਂ ਹੋ ਰਿਹਾ ਕਿ ਅਸੀਂ 100 ਐਪੀਸੋਡ ਪੂਰੇ ਕਰ ਲਏ ਹਨ। ਇਹ ਹਾਲੇ ਵੀ ਕੱਲ੍ਹ ਦੀ ਗੱਲ ਲੱਗਦੀ ਹੈ। ਹੁਣ ਤਕ ਦਾ ਸਫ਼ਰ ਬਹੁਤ ਸ਼ਾਨਦਾਰ ਰਿਹਾ ਅਤੇ ਮੈਂ ਖ਼ੁਸ਼ ਹਾਂ ਕਿ ਮੈਨੂੰ ਅਜਿਹੇ ਸਹਿਯੋਗੀ ਕਲਾਕਾਰ ਮਿਲੇ ਜਿਨ੍ਹਾਂ ਨੇ ਅੱਗੇ ਵਧਣ ਲਈ ਨਿੱਤ ਦਿਨ ਮੇਰੀ ਮਦਦ ਕੀਤੀ। ਮੈਨੂੰ ਲੱਗਦਾ ਹੈ ਕਿ ਜੇ ਸਾਡੇ ਪਿਆਰੇ ਪ੍ਰਸ਼ੰਸਕ ਨਾ ਹੁੰਦੇ ਤਾਂ ਇਥੋਂ ਤਕ ਪਹੁੰਚਣਾ ਔਖਾ ਸੀ। ਉਮੀਦ ਹੈ ਕਿ ਦਰਸ਼ਕ ਆਪਣਾ ਪਿਆਰ ਅਤੇ ਆਸ਼ੀਰਵਾਦ ਦਿੰਦੇ ਰਹਿਣਗੇ।’’ ਸ਼ਗੁਨ ਨੇ ਕਿਹਾ ਕਿ ਇਹ ਉਸ ਲਈ ਸ਼ੁਰੂਆਤ ਲੱਗ ਰਹੀ ਹੈ। ਉਸ ਨੇ ਨਿਰਮਾਤਾ ਸੁਮੀਤ ਹੁਕਮਚੰਦ ਮਿੱਤਲ ਅਤੇ ਸ਼ਸ਼ੀ ਮਿੱਤਲ ਦੀ ਸ਼ਲਾਘਾ ਕਰਦਿਆਂ ਉਨ੍ਹਾਂ ਦਾ ਧੰਨਵਾਦ ਕੀਤਾ। ਉਸ ਨੇ ਕਿਹਾ ਕਿ ਉਸ ਨੂੰ ਕੰਮ ਕਰਨ ਲਈ ਆਰਾਮਦਾਇਕ ਮਾਹੌਲ ਦਿੱਤਾ ਗਿਆ। ਸੈੱਟ ’ਤੇ ਵੀ ਉਸ ਨੂੰ ਘਰ ਵਰਗਾ ਮਾਹੌਲ ਲੱਗਦਾ ਹੈ।’’ ਜ਼ਿਕਰਯੋਗ ਹੈ ਕਿ ਲੜਲਵਾਰ ‘ਮੀਤ’ ਜ਼ੀ ਟੀਵੀ ’ਤੇ ਪ੍ਰਸਾਰਿਤ ਹੁੰਦਾ ਹੈ। -ਆਈਏਐੱਨਐੱਸ