ਐਮਾਜ਼ੋਨ ਪ੍ਰਾਈਮ ਵੀਡੀਓਜ਼ ਵੱਲੋਂ ‘ਇਨਸਾਈਡ ਐੱਜ’ ਦੇ ਤੀਜੇ ਸੀਜ਼ਨ ਦਾ ਐਲਾਨ

ਮੁੰਬਈ: ਸਟਰੀਮਿੰਗ ਪਲੈਟਫਾਰਮ ਐਮਾਜ਼ੋਨ ਪ੍ਰਾਈਮ ਵੀਡੀਓਜ਼ ਨੇ ਸੋਮਵਾਰ ਨੂੰ ਆਪਣੀ ਸਫ਼ਲ ਸਪੋਰਟਸ ਡਰਾਮਾ ਸੀਰੀਜ਼ ‘ਇਨਸਾਈਡ ਐੱਜ’ ਦੇ ਤੀਸਰੇ ਸੀਜ਼ਨ ਦਾ ਐਲਾਨ ਕੀਤਾ ਹੈ। ਉਨ੍ਹਾਂ ਆਪਣੇ ਦਰਸ਼ਕਾਂ ਨੂੰ ਕਿਹਾ ਕਿ ਇਹ ਸੀਜ਼ਨ ਛੇਤੀ ਹੀ ਰਿਲੀਜ਼ ਕੀਤਾ ਜਾਵੇਗਾ। ਕਰਨ ਅੰਸ਼ੂਮਨ ਦੀ ਪੇਸ਼ਕਸ਼ ਅਤੇ ਕਨਿਸ਼ਕ ਵਰਮਾ ਦੀ ਨਿਰਦੇਸ਼ਨਾ ਹੇਠ ਬਣੀ ਇਸ ਸੀਰੀਜ਼ ਵਿੱਚ ਰਿੱਚਾ ਚੱਢਾ, ਵਿਵੇਕ ਓਬਰਾਏ, ਸਯਾਨੀ ਗੁਪਤਾ, ਆਮਿਰ ਬਸ਼ੀਰ, ਤਨੁਜ ਵਿਰਮਾਨੀ, ਸਪਨਾ ਪੱਬੀ, ਅਮਿਤ ਸਿਆਲ, ਅਕਸ਼ੈ ਓਬਰਾਏ ਤੇ ਸਿਧਾਂਤ ਗੁਪਤਾ ਵੀ ਸ਼ਾਮਲ ਹਨ। ਐਮਾਜ਼ੋਨ ਪ੍ਰਾਈਮ ਵੀਡੀਓਜ਼ ਦੇ ਇੰਸਟਾਗ੍ਰਾਮ ਦੇ ਪੇਜ ’ਤੇ ਇਸ ਸ਼ੋਅ ਦੇ ਨਵੇਂ ਲੋਗੋ ਨੂੰ ਸਾਂਝਾ ਕਰਦਿਆਂ ਲਿਖਿਆ ਗਿਆ, ‘ਜ਼ਿਆਦਾ ਕ੍ਰਿਕਟ, ਜ਼ਿਆਦਾ ਡਰਾਮਾ, ਜ਼ਿਆਦਾ ਮਨੋਰੰਜਨ-ਸੀਜ਼ਨ 3 ਆ ਰਿਹਾ ਹੈ ਛੇਤੀ ਹੀ।’ ਜ਼ਿਕਰਯੋਗ ਹੈ ਕਿ ਕ੍ਰਿਕਟ ਦੀ ਪਿੱਠਭੂਮੀ ਵਾਲੇ ਇਸ ਸ਼ੋਅ ਵਿੱਚ ਤਾਕਤ, ਪੈਸਾ, ਸ਼ੋਹਰਤ ਅਤੇ ਖੇਡ ਪਿੱਛੇ ਕੰਮ ਕਰ ਰਹੀਆਂ ਦਿਮਾਗੀ ਚਾਲਾਂ ਦੀ ਪੇਸ਼ਕਾਰੀ ਕੀਤੀ ਗਈ ਹੈ। ਇਹ ਸੀਰੀਜ਼ ਰਿਤੇਸ਼ ਸਿਧਵਾਨੀ ਦੀ ਪੇਸ਼ਕਾਰੀ ਹੈ ਤੇ ਫਰਹਾਨ ਅਖ਼ਤਰ ਦੇ ‘ਐਕਸੈੱਲ ਐਂਟਰਟੇਨਮੈਂਟ’ ਬੈਨਰ ਹੇਠ ਬਣਾਈ ਜਾ ਰਹੀ ਹੈ। ਇਸ ਸੀਰੀਜ਼ ਦਾ ਪਹਿਲਾ ਸੀਜ਼ਨ 2017 ਵਿੱਚ ਰਿਲੀਜ਼ ਹੋਇਆ ਸੀ, ਜਿਸ ਵਿੱਚ ਮੈਚ ਫਿਕਸਿੰਗ ਤੇ ਜੂਏ ਦਾ ਜ਼ਿਕਰ ਕੀਤਾ ਗਿਆ ਸੀ, ਜਦਕਿ 2019 ਵਿੱਚ ਆਏ ਸੀਜ਼ਨ 2 ਵਿੱਚ ਖੇਡਾਂ ਦੌਰਾਨ ਕੀਤੇ ਜਾਂਦੇ ਨਸ਼ਿਆਂ ਨੂੰ ਕੇਂਦਰ ਵਿੱਚ ਰੱਖਿਆ ਗਿਆ ਸੀ। ਇਹ ਸੀਰੀਜ਼ ਐਮਾਜ਼ੋਨ ਪ੍ਰਾਈਮ ਵੀਡੀਓਜ਼ ਵੱਲੋਂ ਪਹਿਲੀ ਮੂਲ ਭਾਰਤੀ ਸੀਰੀਜ਼ ਹੈ। -ਪੀਟੀਆਈ