ਇਕ ਹੋਰ ਸੁਪਰਹੀਰੋ ਫ਼ਿਲਮ ਬਣਾਉਣਾ ਚਾਹੁੰਦੇ ਹਨ ਅਨੁਭਵ ਸਿਨਹਾ

ਮੁੰਬਈ, 26 ਅਕਤੂਬਰ

ਫ਼ਿਲਮਸਾਜ਼ ਅਨੁਭਵ ਸਿਨਹਾ ਨੇ ਕਿਹਾ ਹੈ ਕਿ ਸ਼ਾਹਰੁਖ਼ ਖਾਨ ਨਾਲ ਉਨ੍ਹਾਂ ਦੀ ਫ਼ਿਲਮ ‘ਰਾ. ਵਨ’ ਪ੍ਰਾਪਤੀ ਵੀ ਸੀ ਤੇ ਨਿਰਾਸ਼ ਕਰਨ ਵਾਲੀ ਵੀ। ਸਿਨਹਾ ਨੇ ਕਿਹਾ ਕਿ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਇਕ ਹੋਰ ਸੁਪਰਹੀਰੋ ਫ਼ਿਲਮ ਉਨ੍ਹਾਂ ਨੂੰ ਬਣਾਉਣੀ ਚਾਹੀਦੀ ਹੈ। 26 ਅਕਤੂਬਰ, 2011 ਨੂੰ ਰਿਲੀਜ਼ ਹੋਈ ਫ਼ਿਲਮ ਵਿਚ ਸ਼ਾਹਰੁਖ਼ ਨੇ ਪਹਿਲੀ ਵਾਰ ਇਕ ਸੁਪਰਹੀਰੋ ਦਾ ਕਿਰਦਾਰ ਅਦਾ ਕੀਤਾ ਸੀ। ਉਸ ਸਾਲ ਦੀ ਇਹ ਸਭ ਤੋਂ ਵੱਡੇ ਬਜਟ ਵਾਲੀ ਫ਼ਿਲਮ ਸੀ। ਹਾਲਾਂਕਿ ‘ਰਾ. ਵਨ’ ਟਿਕਟ ਖਿੜਕੀ ਉਤੇ ਕੋਈ ਕਮਾਲ ਨਹੀਂ ਦਿਖਾ ਸਕੀ। ਫ਼ਿਲਮ ਦੀ ਨੌਵੀਂ ਵਰ੍ਹੇਗੰਢ ’ਤੇ ਸਿਨਹਾ ਨੇ ਕਿਹਾ ਕਿ ਰਿਲੀਜ਼ ਉਨ੍ਹਾਂ ਨੂੰ ‘ਕੌੜੇ-ਮਿੱਠੇ’ ਅਹਿਸਾਸ ਦੇ ਗਈ। ਫ਼ਿਲਮ ਵਿਚ ਕਰੀਨਾ ਕਪੂਰ ਤੇ ਅਰਜੁਨ ਰਾਮਪਾਲ ਵੀ ਅਹਿਮ ਭੂਮਿਕਾਵਾਂ ਵਿਚ ਸਨ। ਇਸ ਦੇ ਕਈ ਵੀਐਫਐਕਸ ਤੇ ਐਕਸ਼ਨ ਸੀਨ ਕਾਫ਼ੀ ਸਰਾਹੇ ਗਏ ਸਨ। ਹਾਲਾਂਕਿ ਕਹਾਣੀ ਨੂੰ ਕਾਫ਼ੀ ਆਲੋਚਨਾ ਝੱਲਣੀ ਪਈ। ਸ਼ਾਹਰੁਖ਼ ਨੇ ਫ਼ਿਲਮ ਵਿਚ ‘ਜੀ. ਵਨ’ ਅਤੇ ਸ਼ੇਖਰ ਦਾ ਦੋਹਰਾ ਕਿਰਦਾਰ ਅਦਾ ਕੀਤਾ ਸੀ। ਵਿਸ਼ਾਲ-ਸ਼ੇਖਰ ਦੇ ਸੰਗੀਤ ਦੀ ਕਾਫ਼ੀ ਤਾਰੀਫ਼ ਹੋਈ ਸੀ ਤੇ ਵਿਸ਼ਵ ਪ੍ਰਸਿੱਧ ਗਾਇਕ ਐਕੋਨ ਨੇ ਵੀ ਫ਼ਿਲਮ ਲਈ ਗੀਤ ਗਾਇਆ ਸੀ। -ਪੀਟੀਆਈ