ਮੁੰਬਈ, 10 ਮਾਰਚ
ਬੌਲੀਵੁੱਡ ਅਦਾਕਾਰ ਫਰਹਾਨ ਅਖ਼ਤਰ ਦੀ ਫ਼ਿਲਮ ‘ਤੂਫਾਨ’ ਡਿਜੀਟਲ ਪਲੈਟਫਾਰਮ ’ਤੇ 21 ਮਈ ਨੂੰ ਰਿਲੀਜ਼ ਹੋਣ ਜਾ ਰਹੀ ਹੈ। ਰਾਕੇਸ਼ ਓਮਪ੍ਰਕਾਸ਼ ਮਹਿਰਾ ਵੱਲੋਂ ਨਿਰਦੇਸ਼ਿਤ ਇਸ ਫਿਲਮ ਵਿੱਚ ਫਰਹਾਨ ਇੱਕ ਮੁੱਕੇਬਾਜ਼ ਦੀ ਭੂਮਿਕਾ ਵਿੱਚ ਨਜ਼ਰ ਆਵੇਗਾ। ਇਸ ਤੋਂ ਇਲਾਵਾ ਮ੍ਰਿਨਲ ਠਾਕੁਰ, ਪਰੇਸ਼ ਰਾਵਲ, ਸੁਪ੍ਰਿਆ ਪਾਠਕ ਕਪੂਰ ਅਤੇ ਹੁਸੈਨ ਦਲਾਲ ਵੀ ਅਹਿਮ ਭੂਮਿਕਾਵਾਂ ’ਚ ਦਿਖਾਈ ਦੇਣਗੇ। ਇਹ ਫ਼ਿਲਮ ਐਮਾਜ਼ੋਨ ਪ੍ਰਾਈਮ ਵੀਡੀਓ ’ਤੇ ਰਿਲੀਜ਼ ਹੋਵੇਗੀ। ਸੱਤ ਸਾਲ ਪਹਿਲਾਂ ਰਿਲੀਜ਼ ਹੋਈ ‘ਭਾਗ ਮਿਲਖਾ ਭਾਗ’ ਦੀ ਸਫ਼ਲਤਾ ਤੋਂ ਬਾਅਦ ਫਰਹਾਨ ਨਾਲ ਮੁੜ ਕੰਮ ਕਰਨ ਸਬੰਧੀ ਮਹਿਰਾ ਨੇ ਕਿਹਾ ਕਿ ਉਸ ਨੂੰ ਪੂਰਾ ਯਕੀਨ ਸੀ ਕਿ ਫ਼ਰਹਾਨ ‘ਤੂਫਾਨ’ ਲਈ ਢੁਕਵਾਂ ਅਦਾਕਾਰ ਹੋਵੇਗਾ। ‘ਤੂਫਾਨ’ ਇੱਕ ਅਜਿਹੀ ਕਹਾਣੀ ਹੈ ਜੋ ਸਾਨੂੰ ਸਾਰਿਆਂ ਨੂੰ ਆਰਾਮ ਦੀ ਦੁਨੀਆਂ ਤੋਂ ਬਾਹਰ ਨਿਕਲ ਕੇ ਆਪਣੇ ਟੀਚਿਆਂ ਦੀ ਪ੍ਰਾਪਤੀ ਲਈ ਸੰਘਰਸ਼ ਵਾਸਤੇ ਪ੍ਰੇਰਿਤ ਤੇ ਉਤਸ਼ਾਹਿਤ ਕਰੇਗੀ। ਅਸੀਂ ਆਪਣੀ ਫਿਲਮ ਦਰਸ਼ਕਾਂ ਅੱਗੇ ਪੇਸ਼ ਕਰਨ ਲਈ ਇੰਤਜ਼ਾਰ ਨਹੀਂ ਕਰ ਸਕਦੇ।’’ ਨਿਰਮਾਤਾ ਰਿਤੇਸ਼ ਸਿਧਵਾਨੀ ਨੇ ਕਿਹਾ, ‘‘ਤੂਫਾਨ’ ਵਿੱਚ ਅਸੀਂ ਡੋਂਗਰੀ ਦੀਆਂ ਗਲੀਆਂ ਦੇ ਇਕ ਗੁੰਡੇ ਦੀ ਮੁੱਕੇਬਾਜ਼ੀ ਪ੍ਰਤੀ ਪ੍ਰੇਰਨਾਦਾਇਕ ਕਹਾਣੀ ਪੇਸ਼ ਕਰਾਂਗੇ, ਐਮਾਜ਼ੋਨ ਪ੍ਰਾਈਮ ਵੀਡੀਓ ਦੇ ਅਧਿਕਾਰੀ ਵਿਜੈ ਸੁਬਰਾਮਨੀਅਮ ਨੇ ਕਿਹਾ, ‘‘ਇਹ ਜੀਵਨ ਦੀਆਂ ਅੜਚਨਾਂ ਦੇ ਬਾਵਜੂਦ ਸੁਫ਼ਨੇ ਪੂਰੇ ਕਰਨ ਲਈ ਅਣਥੱਕ ਯਤਨਾਂ ਨੂੰ ਦਰਸਾਉਂਦੀ ਦਿਲਚਸਪ ਅਤੇ ਪ੍ਰੇਰਨਾਦਾਇਕ ਕਹਾਣੀ ਹੈ।’’
-ਆਈਏਐੱਨਐੱਸ
