ਨਾਗਪੁਰ:
ਬੌਲੀਵੁੱਡ ਤੇ ਮਰਾਠੀ ਫ਼ਿਲਮਾਂ ਨੂੰ ਸੰਗੀਤ ਦੇਣ ਵਾਲੀ ‘ਰਾਮ ਲਕਸ਼ਣ’ ਦੀ ਪ੍ਰਸਿੱਧ ਜੋੜੀ ਵਿਚੋਂ ਵਿਜੇ ਪਾਟਿਲ (79) ਦੀ ਅੱਜ ਦਿਲ ਦਾ ਦੌਰਾ ਪੈਣ ਕਾਰਨ ਮੌਤ ਹੋ ਗਈ। ਪਾਟਿਲ ਦੇ ਪੁੱਤਰ ਅਮਰ ਨੇ ਆਖਿਆ ਕਿ ਉਨ੍ਹਾਂ ਨੂੰ ਦਿਲ ਦਾ ਦੌਰਾ ਪਿਆ ਤੇ ਉਨ੍ਹਾਂ ਹਾਲ ਹੀ ਵਿਚ ਕੋਵਿਡ ਦੀ ਦੂਜੀ ਡੋਜ਼ ਲਈ ਸੀ। ‘ਰਾਮ ਲਕਸ਼ਮਣ’ ਦੀ ਜੋੜੀ ਪਾਟਿਲ ਤੇ ਸੁਰੇਂਦਰ ਨੇ ਪਿਛਲੇ ਚਾਰ ਦਹਾਕਿਆਂ ਦੌਰਾਨ ਬਹੁਤ ਸਾਰੀਆਂ ਹਿੰਦੀ ਤੇ ਮਰਾਠੀ ਫ਼ਿਲਮਾਂ ਨੂੰ ਪ੍ਰਸਿੱਧ ਗਾਣੇ ਦਿੱਤੇ ਹਨ। ਜਿਨ੍ਹਾਂ ਵਿਚ ‘ਮੈਨੇ ਪਿਆਰ ਕੀਆ, ਹਮ ਆਪ ਕੇ ਹੈਂ ਕੌਨ, ਹਮ ਸਾਥ ਸਾਥ ਹੈਂ, ਏਜੰਟ ਵਿਨੋਦ, ਤਰਾਨਾ, 100 ਡੇਜ਼, ਹਮ ਸੇ ਬੜ੍ਹਕਰ ਕੌਨ’ ਤੇ ਹੋਰ ਫ਼ਿਲਮਾਂ ਸ਼ਾਮਲ ਹਨ। ਪ੍ਰਸਿੱਧ ਗਾਇਕਾ ਲਤਾ ਮੰਗੇਸ਼ਕਰ ਨੇ ਪਾਟਿਲ ਦੀ ਮੌਤ ’ਤੇ ਦੁੱਖ ਪ੍ਰਗਟਾਇਆ ਹੈ।
-ਆਈਏਐੱਨਐੱਸ
