ਮੁੰਬਈ: ਤੇਲਗੂ ਫਿਲਮਾਂ ਦੇ ਅਦਾਕਾਰ ਰਵੀ ਤੇਜਾ ਦੀ ਐਕਸ਼ਨ ਫਿਲਮ ‘ਖਿਲਾੜੀ’ ਹੁਣ ਹਿੰਦੀ ਭਾਸ਼ਾ ਵਿੱਚ ਵੀ ਰਿਲੀਜ਼ ਹੋਣ ਜਾ ਰਹੀ ਹੈ। ਇਹ ਫਿਲਮ 11 ਫਰਵਰੀ ਨੂੰ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਕੀਤੀ ਜਾਵੇਗੀ। ਰਮੇਸ਼ ਵਰਮਾ ਵੱਲੋਂ ਨਿਰਦੇਸ਼ਿਤ ਇਸ ਫਿਲਮ ਵਿੱਚ ਰਵੀ ਤੇਜਾ ਨੂੰ ਬਿਲਕੁਲ ਵੱਖਰੇ ਅਤੇ ਨਵੇਂ ਅਵਤਾਰ ਵਿੱਚ ਪੇਸ਼ ਕੀਤਾ ਗਿਆ ਹੈ। ਇਸ ਫਿਲਮ ਦਾ ਨਿਰਮਾਣ ਪੈੱਨ ਸਟੂਡੀਓ ਵੱਲੋਂ ‘ਏ’ ਸਟੂਡੀਓਜ਼ ਨਾਲ ਰਲ ਕੇ ਕੀਤਾ ਗਿਆ ਹੈ। ਇਸ ਫਿਲਮ ਵਿੱਚ ਮਿਨਾਕਸ਼ੀ ਚੌਧਰੀ ਅਤੇ ਡਿੰਪਲ ਹਯਾਤੀ ਨੇ ਵੀ ਮੁੱਖ ਭੂਮਿਕਾਵਾਂ ਨਭਾਈਆਂ ਹਨ। ਜੈਅੰਤੀਲਾਲ ਗੜਾ ਨੇ ਇਸ ਫਿਲਮ ਦੀ ਰਿਲੀਜ਼ ਬਾਰੇ ਕਿਹਾ, ‘ਬਦਲ ਰਹੇ ਸਮੇਂ ਵਿੱਚ ਹੁਣ ਅਸਲ ਮੁੱਦਿਆਂ ’ਤੇ ਬਣਨ ਵਾਲੀਆਂ ਫਿਲਮਾਂ ਦੀ ਮੰਗ ਵਧੀ ਹੈ। ਦਰਸ਼ਕ ਫਿਲਮ ਨੂੰ ਇਸ ਦੇ ਅਸਲ ਰੂਪ ਵਿੱਚ ਹੀ ਵੇਖਣਾ ਪਸੰਦ ਕਰਦੇ ਹਨ।’ ਗੜਾ ਨੇ ਕਿਹਾ, ‘‘ਖਿਲਾੜੀ’ ਦੀ ਕਹਾਣੀ ਬਹੁਤ ਹੀ ਰੌਚਕ ਹੈ। ਪੈੱਨ ਸਟੂਡੀਓਜ਼ ਨੇ ਰਵੀ ਤੇਜਾ ਦੀ ਭਾਰਤ ਪੱਧਰ ’ਤੇ ਬਣੀ ਪਛਾਣ ਨੂੰ ਵੇਖਦੇ ਹੋਏ ਇਹ ਫ਼ੈਸਲਾ ਲਿਆ ਹੈ ਕਿ ਇਸ ਫਿਲਮ ਨੂੰ ਹਿੰਦੀ ਭਾਸ਼ਾ ਵਿੱਚ ਵੀ ਸਿਨੇਮਾ ਘਰਾਂ ’ਚ ਰਿਲੀਜ਼ ਕੀਤਾ ਜਾਵੇ।’ ਜ਼ਿਕਰਯੋਗ ਹੈ ਕਿ ਉੱਤਰੀ ਭਾਰਤ ਵਿੱਚ ਇਸ ਫਿਲਮ ਦੀ ਡਿਸਟ੍ਰੀਬਿਊਸ਼ਨ ਦੇ ਅਧਿਕਾਰ ਪੈੱਨ ਮਰੂਧਾਰ ਕੋਲ ਹਨ। -ਆਈਏਐੱਨਐੱਸ
ਸਬੰਧਿਤ ਖ਼ਬਰਾਂ
