ਮੁੰਬਈ, 10 ਅਕਤੂਬਰ
ਪ੍ਰਸਿੱਧ ਗਾਇਕਾ ਰੇਖਾ ਭਾਰਦਵਾਜ ਅਤੇ ਦਲੇਰ ਮਹਿੰਦੀ ਨੇ ਆਉਣ ਵਾਲੀ ਵੈੱਬ ਸੀਰੀਜ਼ ‘ਟੱਬਰ’ ਲਈ ਗਾਏ ਨਵੇਂ ਗੀਤ ‘ਤੁਰਿਆ ਤੁਰਿਆ’ ਨਾਲ ਸਰੋਤਿਆਂ ’ਤੇ ਜਾਦੂਮਈ ਪ੍ਰਭਾਵ ਪਾਇਆ ਹੈ। ਇਹ ਗੀਤ ਦਾ ਸੰਗੀਤ ਨਿਰਦੇਸ਼ਕ ਸਨੇਹਾ ਖਾਨਵਲਕਰ ਨੇ ਤਿਆਰ ਕੀਤਾ ਹੈ। ਗੀਤ ਬਾਰੇ ਗੱਲਬਾਤ ਕਰਦਿਆਂ ਰੇਖਾ ਭਾਰਦਵਾਜ ਨੇ ਕਿਹਾ, ‘‘ਤੁਰਿਆ ਤੁਰਿਆ’ ਗੀਤ ਗਾਉਣਾ ਆਪਣੇ-ਆਪ ’ਚ ਅਹਿਮ ਹੈ ਜੋ ਸ਼ਕਤੀ ਦੇਣ ਤੋਂ ਇਲਾਵਾ ਦਿਲ ਨੂੰ ਸਕੂਨ ਦੇਣ ਵਾਲਾ ਵੀ ਹੈ। ‘ਟੱਬਰ’ ਇੱਕ ਤੇਜ਼ ਰਫ਼ਤਾਰ ਪਰਿਵਾਰਕ ਥ੍ਰਿਲਰ ਹੈ ਤੇ ਇਸ ਗੀਤ ਦੇ ਬੋਲ ਇਸ ਵੈੱਬ ਸੀਰੀਜ਼ ਦੇ ਪਲਾਟ ਨਾਲ ਬਾਖ਼ੂਬੀ ਮੇਲ ਖਾਂਦੇ ਹਨ। ਇਹ ਗੀਤ ਉਨ੍ਹਾਂ ਸਮੱਸਿਆਵਾਂ ਨੂੰ ਦਰਸਾਉਂਦਾ ਹੈ, ਜੋ ਸ਼ੋਅ ਵਿੱਚ ਕਿਰਦਾਰਾਂ ਨੂੰ ਦਰਪੇਸ਼ ਹਨ ਤੇ ਮੈਨੂੰ ਭਰੋਸਾ ਹੈ ਕਿ ਇਹ ਗੀਤ ਲੋਕਾਂ ਨੂੰ ਜ਼ਰੂਰ ਪਸੰਦ ਆਵੇਗਾ।’’ ਦਲੇਰ ਮਹਿੰਦੀ ਨੇ ਕਿਹਾ, ‘ਮੈਨੂੰ ਹਮੇਸ਼ਾ ਪ੍ਰੇਰਨਾਦਾਇਕ ਗੀਤ ਗਾਉਣੇ ਪਸੰਦ ਰਹੇ ਹਨ ਤੇ ‘ਤੁਰਿਆ ਤੁਰਿਆ’ ਇੱਕ ਅਜਿਹਾ ਹੀ ਟਰੈਕ ਹੈ। ਜ਼ਿਕਰਯੋਗ ਹੈ ਕਿ ਅਜੀਤਪਾਲ ਸਿੰਘ ਵੱਲੋਂ ਨਿਰਦੇਸ਼ਤ ਇਸ ਵੈੱਬ ਸੀਰੀਜ਼ ਵਿੱਚ ਪਵਨ ਮਲਹੋਤਰਾ, ਸੁਪ੍ਰਿਆ ਪਾਠਕ, ਗਗਨ ਅਰੋੜਾ ਤੇ ਪਰਮਵੀਰ ਸਿੰਘ ਚੀਮਾ ਵੀ ਨਜ਼ਰ ਆਉਣਗੇ। ਇਹ ਲੜੀ 15 ਅਕਤੂਬਰ ਨੂੰ ਸੋਨੀ ਲਿਵ ’ਤੇ ਰਿਲੀਜ਼ ਹੋਵੇਗੀ। -ਆਈਏਐੱਨਐੱਸ
