ਮੁੰਬਈ: ਅਦਾਕਾਰ ਆਲੀਆ ਭੱਟ ਦੇ ਜਨਮ ਦਿਨ ਮੌਕੇ ਅੱਜ ਨਿਰਮਾਤਾਵਾਂ ਨੇ ਉਸ ਵੱਲੋਂ ਆਉਣ ਵਾਲੀ ਫਿਲਮ ‘ਬ੍ਰਹਮਾਸਤਰ’ ਵਿੱਚ ਨਿਭਾਏ ਕਿਰਦਾਰ ਦੀ ਪਹਿਲੀ ਝਲਕ ਸਾਂਝੀ ਕੀਤੀ ਹੈ। 2012 ਵਿੱਚ ਫਿਲਮ ‘ਸਟੂਡੈਂਟ ਆਫ ਦਿ ਯੀਅਰ’ ਰਾਹੀਂ ਆਲੀਆ ਨੂੰ ਸਿਨੇ ਜਗਤ ਵਿੱਚ ਲਿਆਉਣ ਵਾਲੇ ਨਿਰਮਾਤਾ ਕਰਨ ਜੌਹਰ ਨੇ ਇੰਸਟਾਗ੍ਰਾਮ ’ਤੇ ਆਲੀਆ ਦੇ ਕਿਰਦਾਰ ਦੀ ਤਸਵੀਰ ਸਾਂਝੀ ਕੀਤੀ। ਤਸਵੀਰ ਹੇਠਾਂ ਉਸ ਨੇ ਲਿਖਿਆ, ‘‘ਮੇਰੀ ਪਿਆਰੀ ਆਲੀਆ, ਜਦੋਂ ਮੈਂ ਇਹ ਲਿਖ ਰਿਹਾ ਹਾਂ ਤਾਂ ਮੈਂ ਤੁਹਾਡੇ ਲਈ ਬਹੁਤ ਪਿਆਰ ਅਤੇ ਸਤਿਕਾਰ ਮਹਿਸੂਸ ਕਰ ਰਿਹਾ ਹਾਂ। ਤੁਹਾਡੀ ਬੇਮਿਸਾਲ ਪ੍ਰਤਿਭਾ ਲਈ ਸਤਿਕਾਰ।’’ ਉਸ ਨੇ ਲਿਖਿਆ, ‘‘10 ਸਾਲ ਪਹਿਲਾਂ ਮੈਨੂੰ ਨਹੀਂ ਪਤਾ ਸੀ ਕਿ ਮੈਂ ਇੱਕ ਦਿਨ ਤੁਹਾਨੂੰ ਮਾਣ ਨਾਲ ਆਪਣਾ ‘ਬ੍ਰਹਮਾਸਤਰ’ ਕਹਿ ਸਕਾਂਗਾ। ਮੇਰੇ ਪਿਆਰ ਅਤੇ ਖੁਸ਼ੀ ਦਾ ਹਥਿਆਰ। ਜਨਮ ਦਿਨ ਮੁਬਾਰਕ, ਹਮੇਸ਼ਾ ਚਮਕਦੇ ਰਹੋ।’’ ਅਯਾਨ ਮੁਖਰਜੀ ਦੇ ਨਿਰਦੇਸ਼ਨ ਹੇਠ ਬਣ ਰਹੀ ਇਸ ਫਿਲਮ ਦੇ ਨਿਰਮਾਤਾ ਫੌਕਸ ਸਟਾਰ ਸਟੂਡੀਓਜ਼, ਧਰਮਾ ਪ੍ਰੋਡਕਸ਼ਨਜ਼, ਪ੍ਰਾਈਮ ਫੌਕਸ ਅਤੇ ਸਟਾਰਲਾਈਟ ਪਿਕਚਰਜ਼ ਹਨ। ਆਲੀਆ ਸਮੇਤ ਅਮਿਤਾਭ ਬੱਚਨ, ਰਣਬੀਰ ਕਪੂਰ, ਮੌਨੀ ਰਾਏ ਅਤੇ ਨਾਗਾਰਜੁਨ ਅੱਕੀਨੇਨੀ ਮੁੱਖ ਕਿਰਦਾਰਾਂ ਵਿੱਚ ਹਨ। -ਆਈਏਐੱਨਐੱਸ
ਸਬੰਧਿਤ ਖ਼ਬਰਾਂ
