ਤਿਰੂਪਤੀ: ਬੌਲੀਵੁੱਡ ਸੁਪਰਸਟਾਰ ਸ਼ਾਹਰੁਖ ਖਾਨ ਨੇ ਆਪਣੇ ਪਰਿਵਾਰਕ ਮੈਂਬਰਾਂ ਨਾਲ ਅੱਜ ਤਿਰੂਮਾਲਾ ਮੰਦਰ ’ਚ ਪੂਜਾ ਕੀਤੀ। ਬੀਤੀ ਰਾਤ ਮੰਦਰ ਪੁੱਜੇ ਸ਼ਾਹਰੁਖ ਨਾਲ ਉਸ ਦੀ ਪਤਨੀ ਗੌਰੀ ਖਾਨ, ਬੇਟੀ ਸੁਹਾਨਾ ਅਤੇ ਅਦਾਕਾਰਾ ਨਯਨਤਾਰਾ ਵੀ ਮੌਜੂਦ ਸਨ। ਤਿਰੂਮਲਾ ਤਿਰੂਪਤੀ ਦੇਵਸਥਾਨਮ ਦੇ ਅਧਿਕਾਰੀਆਂ ਨੇ ਸ਼ਾਹਰੁਖ ਦਾ ਮੰਦਰ ਪੁੱਜਣ ’ਤੇ ਸਵਾਗਤ ਕੀਤਾ।
ਦਰਸ਼ਨ ਤੋਂ ਬਾਅਦ ਸ਼ਾਹਰੁਖ ਅਤੇ ਉਨ੍ਹਾਂ ਦਾ ਪਰਿਵਾਰ ਰੰਗਨਾਯਕੁਲਾ ਮੰਡਪ ਪਹੁੰਚਿਆ ਜਿੱਥੇ ਪੁਜਾਰੀਆਂ ਨੇ ਵੇਦ ਉਚਾਰਣ ਕੀਤਾ ਅਤੇ ਪ੍ਰਸ਼ਾਦ ਦਿੱਤਾ। ਸ਼ਾਹਰੁਖ ਨੇ ਫਿਲਮ ‘ਜਵਾਨ’ ਦੀ ਰਿਲੀਜ਼ ਹੋਣ ਤੋਂ ਪਹਿਲਾਂ ਤਿਰੂਮਾਲਾ ਮੰਦਰ ’ਚ ਪੂਜਾ ਅਰਚਨਾ ਕੀਤੀ। ਇਸ ਫਿਲਮ ਦਾ ਨਿਰਮਾਣ ਗੌਰੀ ਖਾਨ ਨੇ ਕੀਤਾ ਹੈ ਤੇ ਇਹ ਫਿਲਮ 7 ਸਤੰਬਰ ਨੂੰ ਰਿਲੀਜ਼ ਹੋਵੇਗੀ। -ਆਈਏਐੱਨਐੱਸ
