ਮੁੰਬਈ: ਅਦਾਕਾਰਾ ਤਾਪਸੀ ਪੰਨੂ ਨੇ ਦੱਸਿਆ ਕਿ ਉਸ ਨੇ ਫਿਲਮ ‘ਵੋਹ ਲੜਕੀ ਹੈ ਕਹਾਂ?’ ਦੀ ਸ਼ੂਟਿੰਗ ਮੁਕੰਮਲ ਕਰ ਲਈ ਹੈ। ਇਹ ਫਿਲਮ ਅਰਸ਼ਦ ਸਈਅਦ ਨੇ ਲਿਖੀ ਹੈ ਅਤੇ ਉਸੇ ਨੇ ਇਸ ਦਾ ਨਿਰਦੇਸ਼ਨ ਕੀਤਾ ਹੈ। ਫਿਲਮ ਵਿਚ ਤਾਪਸੀ ਨੇ ਇੱਕ ਪੁਲੀਸ ਮੁਲਾਜ਼ਮ ਦੀ ਭੂਮਿਕਾ ਨਿਭਾਈ ਹੈ। ਫਿਲਮ ਦੀ ਸ਼ੂਟਿੰਗ ਮੁਕੰਮਲ ਹੋਣ ਸਬੰਧੀ 34 ਸਾਲਾ ਅਦਾਕਾਰਾ ਨੇ ਇੰਸਟਾਗ੍ਰਾਮ ਰਾਹੀਂ ਦੱਸਿਆ, ‘‘ਇੱਕ ਹੋਰ ਫਿਲਮ ਦੀ ਸ਼ੂਟਿੰਗ ਮੁਕੰਮਲ ਹੋ ਗਈ ਹੈ। ਮੈਂ ਤੁਹਾਨੂੰ ਦੱਸ ਨਹੀਂ ਸਕਦੀ ਕਿ ਇਹ ਫਿਲਮ ਮੇਰੇ ਲਈ ਕਿੰਨੀ ਮਹੱਤਵਪੂਰਨ ਹੈ। ਸਾਲਾਂ ਤੋਂ ਸਰੀਰਕ ਤੇ ਮਾਨਸਿਕ ਥਕਾਵਟ ਵਾਲੀਆਂ ਫਿਲਮਾਂ ਤੋਂ ਬਾਅਦ ਹੁਣ ਮੈਂ ਫਿਲਮ ‘ਵੋਹ ਲੜਕੀ ਹੈ ਕਹਾਂ?’ ਰਾਹੀਂ ਤੁਹਾਨੂੰ ਹਸਾਉਣ ਦੀ ਕੋਸ਼ਿਸ਼ ਕਰਾਂਗੀ। ਇਹ ਬਹੁਤ ਸ਼ਾਨਦਾਰ ਤਜਰਬਾ ਰਿਹਾ।’’ ਉਸ ਨੇ ਸਹਿ-ਕਲਾਕਾਰ ਪ੍ਰਤੀਕ ਗਾਂਧੀ, ਨਿਰਦੇਸ਼ਕ ਅਰਸ਼ਦ ਸਈਅਦ ਅਤੇ ਨਿਰਮਾਤਾਵਾਂ ‘ਰੌਏ ਕਪੂਰ ਫਿਲਮਜ਼’ ਅਤੇ ‘ਜੰਗਲੀ ਪਿਕਚਰਜ਼’ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਉਹ ਇਸ ਪ੍ਰਾਜੈਕਟ ਲਈ ਕੰਮ ਕਰਨ ਦਾ ਤਜਰਬਾ ਹਮੇਸ਼ਾ ਯਾਦ ਰੱਖਾਂਗੀ। ਉਸ ਨੇ ਕਿਹਾ, ‘‘ਮੈਨੂੰ ਏਸੀਪੀ ਕੋਮਲ ਸ਼ਰਮਾ ਦਾ ਕਿਰਦਾਰ ਨਿਭਾਉਣ ਵਿਚ ਬਹੁਤ ਮਜ਼ਾ ਆਇਆ। ਕਿਸੇ ਪੁਲੀਸ ਮੁਲਾਜ਼ਮ ਵਜੋਂ ਇਹ ਮੇਰਾ ਪਹਿਲਾ ਕਿਰਦਾਰ ਸੀ।’’
ਪ੍ਰਤੀਕ ਗਾਂਧੀ ਨੇ ਉਸ ਦੀ ਪੋਸਟ ’ਤੇ ਟਿੱਪਣੀ ਕਰਿਦਆਂ ਕਿਹਾ ਕਿ ਤਾਪਸੀ ਨਾਲ ਕੰਮ ਕਰਨ ਦਾ ਤਜਰਬਾ ਸ਼ਾਨਦਾਰ ਰਿਹਾ। ਜ਼ਿਕਰਯੋਗ ਹੈ ਕਿ ਫਿਲਮ ‘ਵੋਹ ਲੜਕੀ ਹੈ ਕਹਾਂ?’ ਇਸ ਸਾਲ ਰਿਲੀਜ਼ ਹੋ ਰਹੀ ਹੈ। -ਪੀਟੀਆਈ
