ਮੁੰਬਈ: ਬੌਲੀਵੁੱਡ ਅਦਾਕਾਰਾ ਤਾਪਸੀ ਪੰਨੂ ਨੇ ਅੱਜ ਸੋਸ਼ਲ ਮੀਡੀਆ ’ਤੇ ਐਲਾਨ ਕੀਤਾ ਕਿ ਉਸ ਨੇ ਆਪਣੀ ਅਗਲੀ ਫਿਲਮ ‘ਸ਼ਾਬਾਸ਼ ਮਿੱਠੂ’ ਦੀ ਸ਼ੂਟਿੰਗ ਸ਼ੁਰੂ ਕਰ ਦਿੱਤੀ ਹੈ। ਉਸ ਨੇ ਕ੍ਰਿਕਟ ਖੇਡੇ ਜਾਣ ਵਾਲੇ ਲਬਿਾਸ ’ਚ ਆਪਣੀ ਇੱਕ ਫੋਟੋ ਸਾਂਝੀ ਕਰਦਿਆਂ ਲਿਖਿਆ ਹੈ, ‘ਚਲੋ ਚੱਲੀਏ, ਪਹਿਲਾ ਦਿਨ#ਸ਼ਾਬਾਸ਼ ਮਿੱਠੂ#ਵਿਮੈੱਨ ਇਨ ਬਲੂ।’ ਤਾਪਸੀ ਪੰਨੂ ਇਸ ਤੋਂ ਪਹਿਲਾਂ ਵੀ ਫਿਲਮ ਸਬੰਧੀ ਕੀਤੀਆਂ ਜਾ ਰਹੀਆਂ ਤਿਆਰੀਆਂ ਬਾਰੇ ਜਾਣਕਾਰੀ ਆਪਣੇ ਪ੍ਰਸ਼ੰਸਕਾਂ ਨਾਲ ਸਾਂਝੀ ਕਰਦੀ ਰਹਿੰਦੀ ਹੈ। ਟਰੇਨਿੰਗ ਸੈਸ਼ਨ ਦੌਰਾਨ ਉਸ ਨੇ ਆਪਣੀਆਂ ਤਸਵੀਰਾਂ ਵੀ ਸਾਂਝੀਆਂ ਕੀਤੀਆਂ ਸਨ। ਇਹ ਫਿਲਮ ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਦੀ ਕਪਤਾਨ ਮਿਥਾਲੀ ਦੋਰਾਈ ਰਾਜ ਦੇ ਜੀਵਨ ’ਤੇ ਆਧਾਰਿਤ ਹੈ। ਇਸੇ ਦੌਰਾਨ ਤਾਪਸੀ ਪੰਨੂ ਫਿਲਮ ‘ਲੂਪ ਲਪੇਟਾ’ ਵਿੱਚ ਵੀ ਨਜ਼ਰ ਆਵੇਗੀ, ਜੋ ਜਰਮਨ ਦੀ ਹਿੱਟ ਫਿਲਮ ‘ਰਨ ਲੋਲਾ ਰਨ’ ਦੀ ਹਿੰਦੀ ਰੀਮੇਕ ਹੈ। ਫਿਲਮ ਵਿੱਚ ਤਾਹਿਰ ਰਾਜ ਭਸੀਨ ਵੀ ਨਜ਼ਰ ਆਉਣਗੇ। ਤਾਪਸੀ ਫਿਲਮ ‘ਹਸੀਨ ਦਿਲਰੁਬਾ’ ਦਾ ਵੀ ਹਿੱਸਾ ਹੈ, ਜਿਸ ਦੇ ਨਿਰਦੇਸ਼ਕ ਵੀਨਿਲ ਮੈਥਿਊ ਹਨ। ਫਿਲਮ ’ਚ ਵਿਕਰਾਂਤ ਮੈਸੀ ਵੀ ਸ਼ਾਮਲ ਹਨ। ਦਰਸ਼ਕ ਤਾਪਸੀ ਨੂੰ ਫਿਲਮ ‘ਰਸ਼ਮੀ ਰਾਕੇਟ’ ਵਿੱਚ ਵੀ ਦੇਖ ਸਕਣਗੇ। -ਆਈਏਐੱਨਐੱਸ
ਸਬੰਧਿਤ ਖ਼ਬਰਾਂ
