ਮੁੰਬਈ, 29 ਜੂਨ
ਅਨੁਸ਼ਕਾ ਸ਼ਰਮਾ ਅਤੇ ਨੈੱਟਫਲਿਕਸ ਉੱਤੇ ਉਸ ਦੀ ਨਵੀਂ ਫ਼ਿਲਮ ‘ਬੁਲਬੁਲ’ ਨੂੰ ਫ਼ਿਲਮ ਵਿੱਚ ਵਰਤੇ ਇਕ ਪੁਰਾਣੇ ਬੰਗਾਲੀ ਲੋਕ ਗੀਤ ਲਈ ਸੋਸ਼ਲ ਮੀਡੀਆ ’ਤੇ ਕਾਫ਼ੀ ਨਿਸ਼ਾਨਾ ਬਣਾਇਆ ਜਾ ਰਿਹਾ ਹੈ। ਇੰਟਰਨੈੱਟ ਦੀ ਵਰਤੋਂ ਕਰਨ ਵਾਲੇ ਇਸ ਗੱਲੋਂ ਨਾਰਾਜ਼ ਹਨ ਕਿ ਗੀਤ ‘ਕਲੰਕਿਨੀ ਰਾਧਾ’ ਦੇ ਬੋਲਾਂ ਵਿੱਚ ਰਾਧਾ ਨੂੰ ਨਕਾਰਾਤਮਕ ਤਰੀਕੇ ਨਾਲ ਵਿਖਾਇਆ ਗਿਆ ਹੈ। ਵਰਤੋਂਕਾਰਾਂ ਨੇ ਉਜਰ ਜਤਾਇਆ ਕਿ ਗੀਤ ਵਿੱਚ ਇਕ ਥਾਂ ਸਬਟਾਈਟਲ ਵਿੱਚ ਰਾਧਾ ਨੂੰ ‘ਬੇਸ਼ਰਮ ਕੁੜੀ’ ਵਜੋਂ ਬਿਆਨਿਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਅਨੁਸ਼ਕਾ ਸ਼ਰਮਾ ਨੇ ਅਜਿਹੀਆਂ ਫ਼ਿਲਮਾਂ ਦਾ ਨਿਰਮਾਣ ਕਰਕੇ ਕਥਿਤ ਹਿੰਦੂਆਂ ਦੀ ਧਾਰਮਿਕ ਭਾਵਨਾਵਾਂ ਦਾ ਨਿਰਾਦਰ ਕੀਤਾ ਹੈ। ‘ਕਲੰਕਿਨੀ ਰਾਧਾ’ ਗੀਤ ਦਵਿਜਾ ਰਤਨਾ ਨੇ ਬ੍ਰਿਟਿਸ਼ ਰਾਜ ਮੌਕੇ ਲਿਖਿਆ ਸੀ ਤੇ ਇਸ ਬੰਗਾਲੀ ਲੋਕ ਗੀਤ ਨੂੰ ਹੁਣ ਤਕ ਕਈ ਗਾਇਕ ਹਸਤੀਆਂ ਵੱਲ ਵੱਖ ਮੰਚਾਂ ’ਤੇ ਗਾ ਚੁੱਕੀਆਂ ਹਨ। ‘ਬਿੱਗ ਬੌਸ 13’ ਫੇਮ ਹਿੰਦੁਸਤਾਨੀ ਭਾਊ ਨੇ ਆਪਣਾ ਰੋਸ ਜਤਾਉਂਦਿਆਂ ਸੋਸ਼ਲ ਮੀਡੀਆ ’ਤੇ ਲਿਖਿਆ, ‘ਅਨੁਸ਼ਕਾ ਸ਼ਰਕਾ ਕੀ ਬੁਲਬੁਲ ਵੈੱਬ ਸੀਰੀਜ਼ ਪਰ ਭਗਵਾਨ ਸ੍ਰੀ ਕ੍ਰਿਸ਼ਨਾ ਔਰ ਰਾਧਾ ਕੋ ਗੰਦੀ ਭਾਸ਼ਾ ਸੇ ਅਪਮਾਨਿਤ ਕੀਆ ਗਯਾ ਹੈ, ਕਯਾ ਐਸੇ ਲੋਗੋਂ ਪਰ ਯੇ ਸਰਕਾਰ ਕਾਰਵਾਈ ਕਰੇਗੀ? ਅਬ ਤਕ ਏਕਤਾ ਕਪੂਰ ਪਰ ਕੋਈ ਭੀ ਕਾਰਵਾਈ ਕਿਉਂ ਨਹੀਂ ਕੀ? ਕਬ ਤਕ ਐਸੇ ਲੋਗ ਹਮਾਰੇ ਦੇਸ਼ ਕੋ ਬਦਨਾਮ ਕਰੇੇਂਗੇ?’ –ਆਈਏਐੱਨਐੱਸ
