ਮੁੰਬਈ, 24 ਅਗਸਤ
ਐਮਾਜ਼ੋਨ ਪ੍ਰਾਈਮ ਵੀਡੀਓ ਨੇ ਐਲਾਨ ਕੀਤਾ ਹੈ ਕਿ ਕ੍ਰਾਈਮ ਡਰਾਮਾ ‘ਮਿਰਜ਼ਾਪੁਰ’ ਦੇ ਦੂਜੇ ਸੀਜ਼ਨ ਦਾ ਪ੍ਰੀਮੀਅਰ 23 ਅਕਤੂਬਰ ਨੂੰ ਹੋਵੇਗਾ। ਡਰਾਮੇ ਦੇ ਪਹਿਲੇ ਸੀਜ਼ਨ ਦੌਰਾਨ ਮਿਰਜ਼ਾਪੁਰ ’ਚ ਬੰਦੂਕਾਂ, ਨਸ਼ੇ ਅਤੇ ਗੁੰਡਾਗਰਦੀ ਨੂੰ ਉਭਾਰ ਕੇ ਪੇਸ਼ ਕੀਤਾ ਗਿਆ ਸੀ। ਸ਼ੋਅ ਦੇ ਦੂਜੇ ਸੀਜ਼ਨ ’ਚ ਪੰਕਜ ਤ੍ਰਿਪਾਠੀ, ਅਲੀ ਫ਼ਜ਼ਲ, ਦਿਵਯੇਂਦੂ, ਸ਼ਵੇਤਾ ਤ੍ਰਿਪਾਠੀ ਸ਼ਰਮਾ, ਰਸਿਕਾ ਦੁੱਗਲ, ਹਰਸ਼ਿਤਾ ਸ਼ੇਖਰ ਗੌੜ, ਅਮਿਤ ਸਿਆਲ, ਅੰਜੁਮ ਸ਼ਰਮਾ, ਸ਼ੀਬਾ ਚੱਢਾ, ਮਨੂ ਰਿਸ਼ੀ ਚੱਢਾ ਅਤੇ ਰਾਜੇਸ਼ ਤੈਲੰਗ ਅਹਿਮ ਭੂਮਿਕਾਵਾਂ ਨਿਭਾਉਣਗੇ। ਐਮਾਜ਼ੋਨ ਪ੍ਰਾਈਮ ਵੀਡੀਓ ਦੀ ਇੰਡੀਆ ਓਰਿਜਨਲਸ ਦੀ ਮੁਖੀ ਅਪਰਣਾ ਪੁਰੋਹਿਤ ਨੇ ਕਿਹਾ ਕਿ ‘ਮਿਰਜ਼ਾਪੁਰ’ ਨੇ ਉਨ੍ਹਾਂ ਦੀ ਪਛਾਣ ਬਣਾਈ ਹੈ ਅਤੇ ਦੂਜਾ ਸੀਜ਼ਨ ਵੀ ਦਰਸ਼ਕਾਂ ਨੂੰ ਪਸੰਦ ਆਵੇਗਾ। ਸੀਰੀਜ਼ ਦੇ ਨਿਰਮਾਤਾ ਐਕਸੈਲ ਮੀਡੀਆ ਐਂਡ ਐਂਟਰਟੇਨਮੈਂਟ ਅਤੇ ਨਿਰਦੇਸ਼ਕ ਗੁਰਮੀਤ ਸਿੰਘ ਤੇ ਮਿਹਿਰ ਦੇਸਾਈ ਹਨ। ਐਕਸੈਲ ਐਂਟਰਟੇਨਮੈਂਟ ਦੇ ਪ੍ਰੋਡਿਊਸਰ ਰਿਤੇਸ਼ ਸਿਧਵਾਨੀ ਨੇ ਕਿਹਾ ਕਿ ਮਿਰਜ਼ਾਪੁਰ ਦੇ ਪਹਿਲੇ ਸੀਜ਼ਨ ਦੀ ਨਾ ਸਿਰਫ਼ ਭਾਰਤ ਸਗੋਂ ਦੁਨੀਆ ਭਰ ’ਚ ਸ਼ਲਾਘਾ ਹੋਈ ਸੀ ਅਤੇ ਦੂਜਾ ਸੀਜ਼ਨ ਵੀ ਦਿਲਚਸਪ ਹੋਵੇਗਾ। -ਪੀਟੀਆਈ
