ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 6 ਨਵੰਬਰ
ਇੱਥੋਂ ਦੇ ਸ਼ਿਵਾਜੀ ਸਟੇਡੀਅਮ ਵਿੱਚ ਚੱਲ ਰਹੇ 27ਵੇਂ ਮਹਿਲਾ ਨਹਿਰੂ ਹਾਕੀ ਮੁਕਾਬਲਿਆਂ ਦੇ ਕੁਆਟਰਫਾਈਨਲ ਲੀਗ ਮੈਚ ਦੌਰਾਨ ਅੰਮ੍ਰਿਤਸਰ ਖ਼ਾਲਸਾ ਕਾਲਜ ਸੀਨੀਅਰ ਸੈਕੰਡਰੀ ਸਕੂਲ (ਲੜਕੀਆਂ) ਦੀ ਟੀਮ ਝਾਰਖੰਡ ਦੇ ਰਾਂਚੀ ਵਿੱਚ ਸਥਿਤ ਸਰਕਾਰੀ ਹਾਈ ਸਕੂਲ, ਬਾਰੇਤੂ ਤੋਂ 2-1 ਨਾਲ ਹਾਰ ਗਈ। ਹਾਲਾਂ ਕਿ ਅੰਮ੍ਰਿਤਸਰ ਦੀ ਟੀਮ ਨੇ ਦੂਜੇ ਮਿੰਟ ਵਿੱਚ ਹੀ ਇੱਕ ਮੈਦਾਨੀ ਗੋਲ ਕਰਕੇ ਬੜਤ ਬਣਾ ਲਈ ਸੀ ਪਰ ਮਗਰੋਂ ਝਾਰਖੰਡ ਦੀ ਟੀਮ ਨੇ ਦੋ ਗੋਲ ਲਗਾਤਾਰ ਕਰਕੇ ਮੈਚ ਆਪਣੀ ਝੋਲੀ ਵਿੱਚ ਪਾ ਲਿਆ। ਡਾਇਰੈਕਟੋਰੇਟ ਜਨਰਲ-ਐਨਸੀਸੀ ਦੀ ਟੀਮ ਨੇ ਉੜੀਸਾ ਦੀ ਨਵਲ ਟਾਟਾ ਹਾਕੀ ਅਕਾਦਮੀ ਨੂੰ 5-2 ਦੇ ਫਰਕ ਨਾਲ ਮਾਤ ਦਿੱਤੀ। ਭਲਕੇ ਮੁਹਾਲੀ ਦੀ ਪੀਆਈਐੱਸ ਹਾਕੀ ਅਕਾਦਮੀ ਦੀ ਟੀਮ ਦਾ ਗਵਾਲੀਅਰ ਦੀ ਕਿਡੀਜ਼ ਕਾਰਨਰ ਹਾਇਰ ਸੈਕੰਡਰੀ ਸਕੂਲ ਨਾਲ ਮੁਕਾਬਲਾ ਹੋਵੇਗਾ। ਇਸ ਮੁਕਾਬਲੇ ਵਿੱਚ ਹਿੱਸਾ ਲੈ ਰਹੀਆਂ ਪੰਜਾਬ ਦੀਆਂ ਦੋਵੋਂ ਮੁਹਾਲੀ ਤੇ ਅੰਮ੍ਰਿਤਸਰ ਦੀਆਂ ਟੀਮਾਂ ਦਾ ਅਗਲਾ ਸਫ਼ਰ ਭਲਕੇ ਹੋਣ ਵਾਲੇ ਹੋਰ ਮੈਚਾਂ ਉਪਰ ਨਿਰਭਰ ਕਰੇਗਾ।
