ਇਲੋਰਡਾ ਕੱਪ: ਭਾਰਤ ਦੇ ਪੰਜ ਮੁੱਕੇਬਾਜ਼ ਕੁਆਰਟਰ ਫਾਈਨਲ ’ਚ ਹਾਰੇ

ਅਸਤਾਨਾ (ਕਜ਼ਾਖਸਤਾਨ): ਭਾਰਤ ਦੇ ਪੰਜ ਮੁੱਕੇਬਾਜ਼ ਅੱਜ ਇੱਥੇ ਆਪੋ ਆਪਣੇ ਕੁਆਰਟਰ ਫਾਈਨਲ ਮੁਕਾਬਲੇ ਹਾਰਨ ਮਗਰੋਂ ਇਲੋਰਡਾ ਕੱਪ ਤੋਂ ਬਾਹਰ ਹੋ ਗਏ। ਜ਼ੋਰਦਾਰ ਪ੍ਰਦਰਸ਼ਨ ਦੇ ਬਾਵਜੂਦ ਜ਼ੋਰਾਮ ਮੁਆਨਾ, ਪੁਖਾਰਾਮ ਕਿਸ਼ਨ ਸਿੰਘ, ਸਿਕਸ਼ਾ, ਅਸ਼ੀਸ਼ ਕੁਮਾਰ ਅਤੇ ਹੇਮੰਤ ਯਾਦਵ ਨੂੰ ਸਰਵਸੰਮਤ ਫ਼ੈਸਲੇ ‘ਚ ਹਾਰ ਮਿਲੀ। ਜ਼ੋਰਾਮ ਮੁਆਨਾ (51 ਕਿੱਲੋ ਭਾਰ ਵਰਗ) ਨੂੰ ਟੋਕੀਓ ਓਲਪਿਕ ‘ਚ ਕਾਂਸੀ ਦਾ ਤਗ਼ਮਾ ਜੇਤੂ ਸਾਕੇਨ ਬਿਬੋਸਿਨੋਵ ਹੱਥੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਜਦਕਿ ਪੁਖਾਰਾਮ (54 ਕਿੱਲੋ ਵਰਗ) ਨੂੰ ਕਜ਼ਾਖਸਤਾਨ ਦੇ ਡੀ. ਮੋਲਦਾਸ਼ੇਵ ਤੋਂ 5-0 ਨਾਲ, ਆਸ਼ੀਸ਼ ਕੁਮਾਰ ਨੂੰ ਥਾਈਲੈਂਡ ਦੇ ਸੁਕਥੇਟ ਸਾਰਾਵੁਤ ਕੋਲੋਂ ਅਤੇ ਹੇਮੰਤ ਯਾਦਵ ਨੂੰ ਕਜ਼ਾਖਸਤਾਨ ਦੇ ਮੁੱਕੇਬਾਜ਼ ਟੀ. ਸ਼ਾਈਕੇਨੋਵ ਹੱਥੋਂ ਹਾਰ ਨਸੀਬ ਹੋਈ। ਸ਼ਿਕਸ਼ਾ ਨੂੰ ਵਿਸ਼ਵ ਚੈਂਪੀਅਨਸ਼ਿਪ ‘ਚ ਕਾਂਸੀ ਦਾ ਤਗ਼ਮਾ ਜੇਤੂ ਕਜ਼ਾਖਸਤਾਨ ਦੀ ਜ਼ਾਈਨਾ ਸ਼ੇਕਰਬੋਕੋਵਾ ਹੱਥੋਂ ਹਾਰ ਮਿਲੀ। ਟੂਰਨਾਮੈਂਟ ‘ਚ ਸ਼ੁੱਕਰਵਾਰ ਨੂੰ ਵਿਜੈ ਕੁਮਾਰ ਕੁਆਰਟਰ ਫਾਈਨਲ ‘ਚ ਕਜ਼ਾਖਸਤਾਨ ਦੇ ਜ਼ੈੱਡ. ਜ਼ੈਨਸਿਸੋਵ ਨਾਲ ਭਿੜੇਗਾ ਜਦਕਿ ਮਹਿਲਾਵਾਂ ਵਿੱਚ ਭਾਰਤੀ ਮੁੱਕੇਬਾਜ਼ ਨੀਮਾ ਸੈਮੀਫਾਈਨਲ ‘ਚ ਕਜ਼ਾਖਸਤਾਨ ਦੀ ਲੌਰਾ ਯੈਸੇਂਕੇਲਡੀ ਦਾ ਸਾਹਮਣਾ ਕਰੇਗੀ। -ਪੀਟੀਆਈ