ਬਹਾਦਰਜੀਤ ਸਿੰਘ
ਰੂਪਨਗਰ, 14 ਮਾਰਚ
ਮੀਡੀਆ ਇਲੈਵਨ ਨੇ ਜ਼ਿਲ੍ਹਾ ਓਲੰਪਿਕ ਐਸੋਸੀਏਸ਼ਨ ਵੱਲੋਂ ਸਥਾਨਕ ਸਰਕਾਰੀ ਕਾਲਜ ਦੇ ਮੈਦਾਨ ਵਿੱਚ ਕਰਵਾਈ ਰੂਪਨਗਰ ਕ੍ਰਿਕਟ ਲੀਗ ਜਿੱਤ ਲਈ ਹੈ।
ਅੱਜ ਖੇਡੇ ਫਾਈਨਲ ਵਿੱਚ ਮੀਡੀਆ ਇਲੈਵਨ ਨੇ ਐੱਸਐੱਸਪੀ ਇਲੈਵਨ ਨੂੰ ਫ਼ਸਵੇਂ ਮੁਕਾਬਲੇ ਵਿੱਚ ਤਿੰਨ ਵਿਕਟਾਂ ਨਾਲ ਹਰਾਇਆ। ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਐੱਸਐੱਸਪੀ ਇਲ਼ੈਵਨ ਦੀ ਟੀਮ 18.4 ਓਵਰਾਂ ਵਿੱਚ 86 ਦੌੜਾਂ ਹੀ ਬਣਾ ਸਕੀ। ਨਵਜੀਤ ਸਿੰਘ ਨੇ 23 ਜਦੋਂਕਿ ਤਲਵਿੰਦਰ ਸਿੰਘ ਨੇ 11 ਦੌੜਾਂ ਦਾ ਯੋਗਦਾਨ ਪਾਇਆ। ਮੀਡੀਆ ਇਲੈਵਨ ਵੱਲੋਂ ਅਮਰਿੰਦਰ ਸਿੰਘ ਨੇ ਤਿੰਨ ਵਿਕਟਾਂ ਹਾਸਲ ਕੀਤੀਆਂ।
ਜਵਾਬ ਵਿੱਚ ਮੀਡੀਆ ਇਲੈਵਨ ਨੇ ਨਿਰਧਾਰਿਤ ਟੀਚਾ ਸਿਰਫ਼ 16 ਓਵਰਾਂ ਵਿਚ ਹੀ 88 ਦੌੜਾਂ ਬਣਾ ਕੇ ਪੂਰਾ ਕਰ ਲਿਆ। ਮੀਡੀਆ ਇਲੈਵਨ ਵੱਲੋਂ ਵੱਲੋਂ ਸਭ ਤੋਂ ਵੱਧ ਅਮਰਿੰਦਰ ਸਿੰਘ ਨੇ 19 ਗੇਂਦਾਂ ਵਿੱਚ ਨਾਬਾਦ 19 ਦੌੜਾਂ ਬਣਾਈਆਂ ਜਦੋਂਕਿ ਮੁਨੀਸ਼ ਨੇ 15 ਦੌੜਾਂ ਦਾ ਯੋਗਦਾਨ ਪਾਇਆ।
ਮੀਡੀਆ ਇਲੈਵਨ ਦੇ ਅਮਰਿੰਦਰ ਸਿੰਘ ਨੂੰ ਮੈਨ ਆਫ ਦਾ ਮੈਚ ਐਲਾਨਿਆ ਗਿਆ ਜਦੋਂਕਿ ਐੱਸਐੱਸਪੀ ਇਲੈਵਨ ਦੇ ਖਿਡਾਰੀ ਜੁਝਾਰ ਸਿੰਘ ਨੂੰ ਸਮੁੱਚੀ ਕ੍ਰਿਕਟ ਲੀਗ ਵਿਚ ਬਿਹਤਰ ਪ੍ਰਦਰਸ਼ਨ ਸਦਕਾ ਮੈਨ ਆਫ ਦਾ ਟੂਰਨਾਮੈਂਟ ਚੁਣਿਆ ਗਿਆ।
ਮੈਚ ਜਿੱਤਣ ਉਪਰੰਤ ਡਿਪਟੀ ਕਮਿਸ਼ਨਰ ਸੋਨਾਲੀ ਗਿਰੀ ਅਤੇ ਐੱਸਐੱਸਪੀ ਡਾ. ਅਖਿਲ ਚੌਧਰੀ ਨੇ ਮੀਡੀਆ ਇਲੈਵਨ ਦੇ ਖਿਡਾਰੀਆਂ ਨੂੰ ਬਿਹਤਰ ਖੇਡ ਦਾ ਪ੍ਰਦਰਸ਼ਨ ਕਰਨ ਅਤੇ ਟੂਰਨਾਮੈਂਟ ਜਿੱਤਣ ’ਤੇ ਮੁਬਾਰਕਬਾਦ ਦਿੱਤੀ।
