ਟੇਬਲ ਟੈਨਿਸ: ਮਨਿਕਾ ਤੇ ਅਕੁਲਾ ਕੁਆਰਟਰ ਫਾਈਨਲ ’ਚ ਪੁੱਜੀਆਂ

ਬਰਮਿੰਘਮ, 5 ਅਗਸਤ

ਭਾਰਤ ਦੀ ਮਨਿਕਾ ਬੱਤਰਾ ਤੇ ਸ੍ਰੀਜਾ ਅਕੁਲਾ ਨੇ ਅੱਜ ਇੱਥੇ ਟੇਬਲ ਟੈਨਿਸ ਮੁਕਾਬਲੇ ’ਚ ਮਹਿਲਾ ਸਿੰਗਲਜ਼ ਕੁਆਰਟਰ ਫਾਈਨਲ ’ਚ ਪ੍ਰਵੇਸ਼ ਕਰ ਲਿਆ ਹੈ। ਬੱਤਰਾ ਨੇ ਆਸਟਰੇਲੀਆ ਦੀ ਜੀ ਮਿਲਹਿਊਂਗ ਨੂੰ 11-4, 11-8, 11-6, 12-10 ਨਾਲ ਹਰਾ ਕੇ ਆਖਰੀ ਅੱਠ ’ਚ ਥਾਂ ਬਣਾਈ। ਇੱਕ ਹੋਰ ਸਿੰਗਲਜ਼ ਮੁਕਾਬਲੇ ’ਚ ਅਕੁਲਾ ਨੂੰ ਵੇਲਜ਼ ਦੀ ਚਾਰਲੋਟ ਕੈਰੀ ਨੇ ਸਖਤ ਟੱਕਰ ਦਿੱਤੀ ਪਰ ਭਾਰਤੀ ਖਿਡਾਰੀ ਨੇ ਇਸ ਮੁਸ਼ਕਿਲ ਮੁਕਾਬਲੇ ’ਚ 8-11, 11-7, 12-14, 9-11, 11-4, 15-13, 12-10 ਨਾਲ ਜਿੱਤ ਦਰਜ ਕੀਤੀ। ਇਸ ਤੋਂ ਪਹਿਲਾਂ ਦਿਨੇ ਮਨਿਕਾ ਤੇ ਜੀ ਸਾਥੀਆਨ ਅਤੇ ਅਚੰਤਾ ਸ਼ਰਤ ਕਮਲ ਤੇ ਅਕੁਲਾ ਦੀਆਂ ਜੋੜੀਆਂ ਨੇ ਆਪੋ-ਆਪਣੇ ਮੈਚ ਜਿੱਤ ਕੇ ਮਿਕਸਡ ਡਬਲਜ਼ ਦੇ ਕੁਆਰਟਰ ਫਾਈਨਲ ’ਚ ਪ੍ਰਵੇਸ਼ ਕੀਤਾ। ਪੁਰਸ਼ ਡਬਲਜ਼ ’ਚ ਸਾਥੀਆਨ ਤੇ ਸ਼ਰਤ ਦੀ ਜੋੜੀ ਵੀ ਆਖਰੀ ਅੱਠ ’ਚ ਪਹੁੰਚਣ ’ਚ ਕਾਮਯਾਬ ਰਹੀ। ਇਸੇ ਤਰ੍ਹਾਂ ਭਾਵਿਨਾ ਪਟੇਲ ਪੈਰਾ ਟੇਬਲ ਟੈਨਿਸ ਮੁਕਾਬਲੇ ਦੇ ਫਾਈਨਲ ’ਚ ਪਹੁੰਚ ਗਈ ਹੈ। -ਪੀਟੀਆਈ