ਰਸ਼ਮਿਕਾ ਮੰਦਾਨਾ ਨੇ ‘ਪੁਸ਼ਪਾ ਦਿ ਰੂਲ’ ਲਈ ਸ਼ੂਟਿੰਗ ਆਰੰਭੀ

ਮੁੰਬਈ: ਅਦਾਕਾਰਾ ਰਸ਼ਮਿਕਾ ਮੰਦਾਨਾ ਨੇ ਪੈਨ-ਇੰਡੀਆ ਫਿਲਮ ‘ਪੁਸ਼ਪਾ-ਦਿ ਰੂਲ’ ਲਈ ਸ਼ੂਟਿੰਗ ਆਰੰਭ ਦਿੱਤੀ ਹੈ। ਅੱਜ ਅਦਾਕਾਰਾ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ‘ਤੇ ਫਿਲਮ ਦੇ ਸੈੱਟ ਦੀਆਂ ਕੁਝ ਤਸਵੀਰਾਂ ਵੀ ਸਾਂਝੀਆਂ ਕੀਤੀਆਂ ਹਨ। ਬਲਾਕਬਸਟਰ ਫਿਲਮ ‘ਪੁਸ਼ਪਾ-ਦਿ ਰਾਈਜ਼’ ਦੇ ਇਸ ਅਗਲੇ ਭਾਗ ਵਿੱਚ ਰਸ਼ਮਿਕਾ ‘ਸ੍ਰੀਵੱਲੀ’ ਦੀ ਭੂਮਿਕਾ ਨਿਭਾਅ ਰਹੀ ਹੈ। ਫਿਲਮ ਦੇ ਪਹਿਲੇ ਭਾਗ ਦਾ ਨਿਰਦੇਸ਼ਨ ਸੁਕੁਮਾਰ ਵੱਲੋਂ ਕੀਤਾ ਗਿਆ ਸੀ, ਜੋ 2021 ਵਿੱਚ 17 ਦਸੰਬਰ ਨੂੰ ਰਿਲੀਜ਼ ਹੋਈ ਸੀ। ਜ਼ਿਕਰਯੋਗ ਹੈ ਕਿ ‘ਪੁਸ਼ਪਾ-ਦਿ ਰਾਈਜ਼’ ਨੇ ਬਾਕਸ ਆਫਿਸ ‘ਤੇ ਨਵਾਂ ਇਤਿਹਾਸ ਸਿਰਜਿਆ ਸੀ। ਫਿਲਮ ਦੇ ਗੀਤਾਂ ਅਤੇ ਸੰਵਾਦਾਂ ਨੇ ਦਰਸ਼ਕਾਂ ਦੇ ਮਨਾਂ ‘ਤੇ ਇੱਕ ਵੱਖਰੀ ਛਾਪ ਛੱਡੀ ਸੀ। ਹੁਣ ਇਸੇ ਛਾਪ ਨੂੰ ਹੋਰ ਡੂੰਘਾ ਕਰਨ ਲਈ ਗਲੋਬਲ ਇੰਡੀਆ ਫਿਲਮ ਦੀ ਪੇਸ਼ਕਸ਼ ‘ਪੁਸ਼ਪਾ-ਦਿ ਰੂਲ’ ਆ ਰਹੀ ਹੈ। ਇਸ ਤੋਂ ਪਹਿਲਾਂ ਅਦਾਕਾਰ ਅੱਲੂ ਅਰਜੁਨ ਦੇ ਜਨਮ ਦਿਨ ਮੌਕੇ ਫਿਲਮ ਦੇ ਨਿਰਮਾਤਾਵਾਂ ਨੇ ‘ਪੁਸ਼ਪਾ 2’ ਦਾ ਪੋਸਟਰ ਵੀ ਜਾਰੀ ਕੀਤਾ ਸੀ। ਇਸ ਪੋਸਟਰ ਵਿੱਚ ਅੱਲੂ ਅਰਜੁਨ ਇੱਕ ਬਿਲਕੁਲ ਵੱਖਰੇ ਅੰਦਾਜ਼ ਵਿੱਚ ਨਜ਼ਰ ਆ ਰਿਹਾ ਹੈ। ਪੋਸਟਰ ਵਿੱਚ ਉਸ ਨੇ ਸੋਨੇ ਦੇ ਗਹਿਣੇ ਤੇ ਨਿੰਬੂਆਂ ਦੀ ਮਾਲਾ ਪਹਿਨੀ ਹੋਈ ਹੈ ਤੇ ਉਸ ਨੇ ਆਪਣੇ ਹੱਥ ਵਿੱਚ ਇੱਕ ਬੰਦੂਕ ਵੀ ਚੁੱਕੀ ਹੋਈ ਹੈ। ਹਾਲ ਦੀ ਘੜੀ ‘ਪੁਸ਼ਪਾ-ਦਿ ਰੂਲ’ ਦੀ ਰਿਲੀਜ਼ ਮਿਤੀ ਦਾ ਬਾਰੇ ਹਾਲੇ ਕੋਈ ਐਲਾਨ ਨਹੀਂ ਕੀਤਾ ਗਿਆ ਹੈ। -ਏਐੱਨਆਈ