ਪਠਾਨਕੋਟ: ਬਲਾਕ ਧਾਰ-2 ਅਧੀਨ ਆਉਂਦੇ ਪ੍ਰਾਇਮਰੀ ਸਕੂਲਾਂ ਦੇ ਬੱਚਿਆਂ ਦੇ ਦੋ ਰੋਜ਼ਾ ਬਲਾਕ ਪੱਧਰੀ ਖੇਡ ਮੁਕਾਬਲੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਸ਼ਾਹਪੁਰਕੰਡੀ ਟਾਊਨਸ਼ਿਪ ਵਿੱਚ ਬੀਈਓ ਰਾਕੇਸ਼ ਠਾਕੁਰ ਦੀ ਅਗਵਾਈ ਵਿੱਚ ਕਰਵਾਏ ਗਏ। ਵੱਖ-ਵੱਖ ਸਕੂਲਾਂ ਤੋਂ ਆਏ ਹੋਏ ਖਿਡਾਰੀਆਂ ਵੱਲੋਂ ਪਹਿਲਾਂ ਮਾਰਚ ਪਾਸਟ ਕੀਤਾ ਗਿਆ। ਉਸ ਦੇ ਬਾਅਦ ਕਬੱਡੀ, ਖੋ-ਖੋ, ਰੱਸਾਕਸ਼ੀ ਦੇ ਮੁਕਾਬਲੇ ਕਰਵਾਏ ਗਏ। ਕਬੱਡੀ ਲੜਕਿਆਂ ਦਾ ਮੁਕਾਬਲਾ ਸੈਂਟਰ ਕੈਲਾਸ਼ਪੁਰ ਅਤੇ ਸੈਂਟਰ ਘੋਹ ਦੇ ਵਿੱਚ ਕਰਵਾਇਆ ਗਿਆ, ਜਿਸ ਵਿੱਚ ਸ਼ਾਨਦਾਨ ਪ੍ਰਦਰਸ਼ਨ ਕਰਦੇ ਹੋਏ ਸੈਂਟਰ ਕੈਲਾਸ਼ਪੁਰ ਦੀ ਟੀਮ ਜੇਤੂ ਰਹੀ। ਖੋ-ਖੋ ਲੜਕੀਆਂ ਦਾ ਫਾਈਨਲ ਮੁਕਾਬਲਾ ਸੈਂਟਰ ਕੈਲਾਸ਼ਪੁਰ ਅਤੇ ਸੈਂਟਰ ਰਾਣੀਪੁਰ ਝਿਕਲਾ ਦੇ ਵਿੱਚ ਕਰਵਾਇਆ ਗਿਆ, ਜਿਸ ਵਿੱਚ ਸੈਂਟਰ ਕੈਲਾਸ਼ਪੁਰ ਦੀ ਟੀਮ ਜੇਤੂ ਰਹੀ।
ਖੋ-ਖੋ ਲੜਕਿਆਂ ਦਾ ਫਾਈਨਲ ਮੁਕਾਬਲਾ ਸੈਂਟਰ ਰਾਣੀਪੁਰ ਝਿਕਲਾ ਅਤੇ ਸੈਂਟਰ ਕੈਲਾਸ਼ਪੁਰ ਦੇ ਵਿੱਚ ਕਰਵਾਇਆ ਗਿਆ, ਜਿਸ ਵਿੱਚ ਕੈਲਾਸ਼ਪੁਰ ਦੀ ਟੀਮ ਜੇਤੂ ਰਹੀ। ਰੱਸਾ-ਕਸ਼ੀ ਲੜਕਿਆਂ ਦੇ ਫਾਈਨਲ ਮੁਕਾਬਲੇ ਵਿੱਚ ਸੈਂਟਰ ਫਿਰੋਜ਼ਪੁਰ ਕਲਾਂ ਦੀ ਟੀਮ ਨੇ ਸੈਂਟਰ ਘੋਹ ਨੂੰ ਹਰਾ ਦਿੱਤਾ। -ਪੱਤਰ ਪ੍ਰੇਰਕ
