ਗਾਜ਼ਾ/ਯੋਰੋਸ਼ਲਮ, 14 ਮਈ
ਇਜ਼ਰਾਇਲ ਨੇ ਅੱਜ ਗਾਜ਼ਾ ਪੱਟੀ ਵਿਚ ਫ਼ਲਸਤੀਨੀ ਦਹਿਸ਼ਤਗਰਦਾਂ ਉਤੇ ਹੋਰ ਹਵਾਈ ਹਮਲੇ ਕੀਤੇ। ਇਜ਼ਰਾਇਲ ਦੇ ਵਪਾਰਕ ਕੇਂਦਰਾਂ ਉਤੇ ਵੀ ਗਾਜ਼ਾ ਵਿਚੋਂ ਲਗਾਤਾਰ ਰਾਕੇਟ ਦਾਗੇ ਜਾ ਰਹੇ ਹਨ। ਦੋਵਾਂ ਧਿਰਾਂ ਵਿਚ ਟਕਰਾਅ ਪੰਜਵੇਂ ਦਿਨ ਵਿਚ ਦਾਖਲ ਹੋ ਗਿਆ ਹੈ ਤੇ ਇਸ ਦੇ ਠੰਢਾ ਪੈਣ ਦੇ ਆਸਾਰ ਨਜ਼ਰ ਨਹੀਂ ਆ ਰਹੇ। ਗਾਜ਼ਾ ਵਿਚ ਕਰੀਬ 109 ਲੋਕ ਮਾਰੇ ਗਏ ਹਨ ਜਿਨ੍ਹਾਂ ਵਿਚ 29 ਬੱਚੇ ਸ਼ਾਮਲ ਹਨ। ਇਜ਼ਰਾਇਲ ਵਿਚ ਸੱਤ ਮੌਤਾਂ ਹੋਈਆਂ ਹਨ। ਇਜ਼ਰਾਇਲ ਦੀ ਫ਼ੌਜ ਨੇ ਕਿਹਾ ਕਿ ਉਹ ਹਮਾਸ ਦੇ ਕਬਜ਼ੇ ਵਾਲੇ ਇਕ ਖੇਤਰ ਨੂੰ ਨਿਸ਼ਾਨਾ ਬਣਾ ਰਿਹਾ ਹੈ। ਇਜ਼ਰਾਇਲ ਦਾ ਕਹਿਣਾ ਹੈ ਕਿ ਸਰਹੱਦ ਪਾਰ ਦੇ ਕਿਸੇ ਇਲਾਕੇ ਉਤੇ ਕਬਜ਼ਾ ਨਹੀਂ ਕੀਤਾ ਗਿਆ ਹੈ। ਇਜ਼ਰਾਇਲ ਆਪਣੇ ਖੇਤਰ ਵਿਚੋਂ ਹੀ ਕਾਰਵਾਈ ਕਰ ਰਿਹਾ ਹੈ। ਉੱਤਰੀ ਗਾਜ਼ਾ ਦੇ ਵਾਸੀਆਂ ਨੇ ਵੀ ਇਸ ਗੱਲ ਦੀ ਪੁਸ਼ਟੀ ਕੀਤੀ ਹੈ ਕਿ ਇਜ਼ਰਾਇਲੀ ਫ਼ੌਜਾਂ ਉਨ੍ਹਾਂ ਦੇ ਇਲਾਕੇ ਵਿਚ ਦਾਖਲ ਨਹੀਂ ਹੋਈਆਂ। ਇਜ਼ਰਾਇਲੀ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਗਾਜ਼ਾ ਦੇ ਸਭ ਤੋਂ ਤਕੜੇ ਅਤਿਵਾਦੀ ਸੰਗਠਨ ‘ਹਮਾਸ’ ਨੂੰ ਗੋਲੀਬੰਦੀ ਤੋਂ ਪਹਿਲਾਂ ਸਖ਼ਤੀ ਨਾਲ ਜਵਾਬ ਦਿੱਤਾ ਜਾਵੇਗਾ ਤੇ ਇਹ ਮੁਹਿੰਮ ਅਜੇ ‘ਹੋਰ ਸਮਾਂ ਚੱਲੇਗੀ।’ ਇਜ਼ਰਾਇਲ ਤੇ ਗਾਜ਼ਾ ਦੀ ਸਰਹੱਦ ਉਤੇ ਰਹਿ ਰਹੇ ਕਈ ਪਰਿਵਾਰਾਂ ਨੇ ਆਪਣੇ ਘਰ ਛੱਡ ਦਿੱਤੇ ਹਨ ਤੇ ਹੋਰ ਥਾਵਾਂ ਉਤੇ ਚਲੇ ਗਏ ਹਨ। ਕਈ ਸੰਯੁਕਤ ਰਾਸ਼ਟਰ ਦੇ ਸਕੂਲਾਂ ਵਿਚ ਸ਼ਰਨ ਲੈ ਰਹੇ ਹਨ। ਹਿੰਸਾ ਹੁਣ ਇਜ਼ਰਾਇਲ ਵਿਚ ਰਲੇ-ਮਿਲੇ ਯਹੂਦੀਆਂ ਤੇ ਅਰਬ ਭਾਈਚਾਰਿਆਂ ਵਿਚ ਵੀ ਫੈਲ ਗਈ ਹੈ। ਕੁਝ ਸ਼ਹਿਰਾਂ ਵਿਚ ਖਾਨਾਜੰਗੀ ਵਰਗੇ ਹਾਲਾਤ ਬਣ ਰਹੇ ਹਨ। -ਏਪੀ
ਸੰਯੁਕਤ ਰਾਸ਼ਟਰ ਸਲਾਮਤੀ ਕੌਂਸਲ ਦੀ ਬੈਠਕ ਐਤਵਾਰ ਨੂੰ
ਨਿਊ ਯਾਰਕ: ਸੰਯੁਕਤ ਰਾਸ਼ਟਰ ਸਲਾਮਤੀ ਕੌਂਸਲ ਐਤਵਾਰ ਨੂੰ ਇਜ਼ਰਾਈਲ ਤੇ ਫ਼ਲਸਤੀਨ ਵਿਚਾਲੇ ਹੋ ਰਹੀ ਹਿੰਸਾ ਤੇ ਜਨਤਕ ਪੱਧਰ ਉਤੇ ਵਿਚਾਰ-ਚਰਚਾ ਕਰੇਗਾ। ਸਾਲਾਂ ਬਾਅਦ ਸਥਿਤੀ ਦੇ ਇਸ ਪੱਧਰ ਉਤੇ ਵਿਗੜ ਜਾਣ ਦੇ ਮੱਦੇਨਜ਼ਰ ਅਮਰੀਕਾ ਵੱਲੋਂ ਹੁਣ ਆਪਣੇ ਸਫ਼ੀਰ ਹਾਦੀ ਅਮਰ ਨੂੰ ਭੇਜਿਆ ਜਾ ਰਿਹਾ ਹੈ। ਮਿਸਰ ਤੇ ਕਤਰ ਵੱਲੋਂ ਵੀ ਸ਼ਾਂਤੀ ਸਮਝੌਤਾ ਕਰਵਾਉਣ ਲਈ ਯਤਨ ਕੀਤੇ ਜਾ ਰਹੇ ਹਨ। ਅਮਰੀਕੀ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ਵੀ ਹਿੰਸਾ ਖ਼ਤਮ ਕਰਨ ਦਾ ਸੱਦਾ ਦਿੱਤਾ ਹੈ।
ਗਾਜ਼ਾ: ਕਰੋਨਾ ਨਾਲ ਜੂਝ ਰਹੇ ਹਸਪਤਾਲ ਹੁਣ ਜ਼ਖ਼ਮੀਆਂ ਨਾਲ ਭਰੇ
ਗਾਜ਼ਾ ਸਿਟੀ: ਕੁਝ ਹਫ਼ਤੇ ਪਹਿਲਾਂ ਤੱਕ ਗਾਜ਼ਾ ਪੱਟੀ ਦੇ ਹਸਪਤਾਲ ਕਰੋਨਾਵਾਇਰਸ ਦੇ ਮਰੀਜ਼ਾਂ ਨਾਲ ਨਜਿੱਠ ਰਹੇ ਸਨ ਜਦਕਿ ਹੁਣ ਇੱਥੇ ਇਜ਼ਰਾਇਲੀ ਹਮਲਿਆਂ ਵਿਚ ਫੱਟੜ ਵਿਅਕਤੀ ਆ ਰਹੇ ਹਨ। ਗਾਜ਼ਾ ਦੇ ਸੱਤਾਧਾਰੀ ਹਮਾਸ ਸ਼ਾਸਕਾਂ ਤੇ ਇਜ਼ਰਾਈਲ ਵਿਚਾਲੇ ਹੋਏ ਟਕਰਾਅ ਵਿਚ ਹੁਣ ਤੱਕ 830 ਲੋਕ ਫੱਟੜ ਹੋ ਚੁੱਕੇ ਹਨ।
