ਯੇਰੂਸ਼ਲੱਮ, 17 ਜੂਨ
ਇਜ਼ਰਾਈਲ ਨੇ ਬਾਲੀਵੁੱਡ ਅਦਾਕਾਰ ਸੁਸ਼ਾਂਤ ਸਿੰਘ ਰਾਜਪੂਤ ਨੂੰ ‘ਇੱਕ ਸੱਚਾ ਮਿੱਤਰ’ ਕਰਾਰ ਦਿੰਦਿਆਂ ਉਸਦੀ ਮੌਤ ’ਤੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ। ਜ਼ਿਕਰਯੋਗ ਹੈ ਕਿ 34 ਵਰ੍ਹਿਆਂ ਦਾ ਸੁਸ਼ਾਂਤ ਰਾਜਪੂਤ ਐਤਵਾਰ ਨੂੰ ਆਪਣੇ ਅਪਾਰਟਮੈਂਟ ਵਿੱਚ ਮ੍ਰਿਤਕ ਹਾਲਤ ’ਚ ਮਿਲਿਆ ਸੀ। ਇਜ਼ਰਾਈਲ ਦੇ ਵਿਦੇਸ਼ ਮੰਤਰਾਲੇ ਦੇ ਡਿਪਟੀ ਡਾਇਰੈਕਟਰ ਜਨਰਲ ਗਿਲਾਡ ਕੋਹੇਨ ਨੇ ਮੰਗਲਵਾਰ ਨੂੰ ਟਵਿੱਟਰ ’ਤੇ ਪੋਸਟ ਰਾਹੀਂ ਸੁਸ਼ਾਂਤ ਰਾਜਪੂਤ ਦੀ ਮੌਤ ’ਤੇ ਦੁੱਖ ਦਾ ਇਜ਼ਹਾਰ ਕੀਤਾ ਹੈ। ਕੋਹੇਨ ਨੇ ਟਵੀਟ ਕੀਤਾ, ‘ਮੈਂ ਇਜ਼ਰਾਈਲ ਦੇ ਇੱਕ ਸੱਚੇ ਦੇ ਮਿੱਤਰ ਸੁਸ਼ਾਂਤ ਸਿੰਘ ਰਾਜਪੂਤ ਦੀ ਮੌਤ ’ਤੇ ਡੂੰਘੀ ਹਮਦਰਦੀ ਦਾ ਇਜ਼ਹਾਰ ਕਰਦਾ ਹਾਂ। ਤੁਸੀਂ ਬਹੁਤ ਯਾਦ ਆਓਗੇ।’ ਉਨ੍ਹਾਂ ਨੇ ਸੁਸ਼ਾਂਤ ਦੀ ਆਖਰੀ ਫ਼ਿਲਮ ‘ਡਰਾਈਵ’ ਦਾ ਗੀਤ ‘ਮੱਖਣਾ’ ਵੀ ਪੋਸਟ ਨਾਲ ਸਾਂਝਾ ਕੀਤਾ ਹੈ। ਇਹ ਗੀਤ ਸੁਸ਼ਾਂਤ ਸਿੰਘ ਰਾਜਪੂਤ ਅਤੇ ਸਾਥੀ ਅਦਾਕਾਰਾ ਜੈਕਲੀਨ ਫਰਨਾਂਡੇਜ਼ ’ਤੇ ਫਿਲਮਾਇਆ ਗਿਆ ਸੀ। -ਪੀਟੀਆਈ
