ਗੁਰਮਲਕੀਅਤ ਸਿੰਘ ਕਾਹਲੋਂ
ਵੈਨਕੂਵਰ, 3 ਜੂਨ
ਇੱਥੋਂ ਨੇੜਲੇ ਐਬਟਸਫੋਰਡ ਸ਼ਹਿਰ ਵਿਚਲੀ ਸਕੋਸ਼ੀਆ ਬੈਂਕ ਨੂੰ ਲੁੱਟਣ ਦੀ ਕੋਸ਼ਿਸ਼ ਗਾਹਕਾਂ ਨੇ ਨਾਕਾਮ ਕਰ ਦਿੱਤੀ ਤੇ ਬੰਦੂਕਧਾਰੀ ਲੁਟੇਰੇ ਨੂੰ ਫੜ ਲਿਆ। ਘਟਨਾ ਦੀ ਸੂਚਨਾ ਮਿਲਣ ’ਤੇ ਮੌਕੇ ’ਤੇ ਪਹੁੰਚੀ ਪੁਲੀਸ ਨੇ ਲੁਟੇਰੇ ਨੂੰ ਹਿਰਾਸਤ ਵਿੱਚ ਲੈ ਲਿਆ। ਪੁਲੀਸ ਦੇ ਬੁਲਾਰੇ ਜੂਡੀ ਬਰਡ ਨੇ ਦੱਸਿਆ ਕਿ ਸ਼ਹਿਰ ਦੇ ਗਲੈਡਵਿਨ ਰੋਡ ਸਥਿਤ ਸਕੋਸ਼ੀਆ ਬੈਂਕ ’ਚ ਦੁਪਹਿਰ ਸਮੇਂ ਇੱਕ ਬੰਦੂਕਧਾਰੀ ਨਕਾਬਪੋਸ਼ ਲੁੱਟ ਦੀ ਨੀਅਤ ਨਾਲ ਆਇਆ। ਉਸ ਨੇ ਸਟਾਫ ਨੂੰ ਬੰਦੂਕ ਦਿਖਾ ਕੇ ਬੈਂਕ ’ਚ ਪਈ ਰਕਮ ਉਸ ਨੂੰ ਦੇਣ ਲਈ ਕਿਹਾ। ਇੰਨੇ ਨੂੰ ਪਿਛੇ ਖੜ੍ਹੇ ਕਿਸੇ ਪੰਜਾਬੀ ਪਛਾਣ ਵਾਲੇ ਗਾਹਕ ਨੇ ਬੰਦੂਕ ਦੀ ਪ੍ਰਵਾਹ ਨਾ ਕਰਦਿਆਂ ਲੁਟੇਰੇ ਨੂੰ ਜੱਫਾ ਮਾਰ ਕੇ ਜ਼ਮੀਨ ’ਤੇ ਸੁੱਟ ਲਿਆ ਅਤੇ ਤਿੰਨ ਹੋਰ ਗਾਹਕਾਂ ਨੇ ਮਿਲ ਕੇ ਲੁਟੇਰੇ ਨੂੰ ਕਾਬੂ ਕਰ ਲਿਆ। ਬੈਂਕ ਅਲਾਰਮ ਵੱਜਣ ਤੋਂ ਚਾਰ ਮਿੰਟ ਬਾਅਦ ਪੁਲੀਸ ਮੌਕੇ ’ਤੇ ਪਹੁੰਚ ਗਈ ਤੇ ਲੁਟੇਰੇ ਨੂੰ ਹਿਰਾਸਤ ’ਚ ਲੈ ਲਿਆ।
