ਸਿੰਗਾਪੁਰ, 7 ਸਤੰਬਰ
ਸਿੰਗਾਪੁਰ ਤੋਂ ਚੀਨ ਦੇ ਗੁਆਂਗਜ਼ੂ ਸ਼ਹਿਰ ਜਾ ਰਹੇ ਜਹਾਜ਼ ਵਿੱਚ ਉਡਾਣ ਦੌਰਾਨ ਝਟਕੇ ਲੱਗਣ ਕਾਰਨ ਸੱਤ ਯਾਤਰੀ ਜ਼ਖ਼ਮੀ ਹੋ ਗਏ। ‘ਦਿ ਸਟ੍ਰੇਟਸ ਟਾਈਮਜ਼’ ਨੇ ਦੱਸਿਆ ਕਿ ਜ਼ਖ਼ਮੀਆਂ ਵਿੱਚੋਂ ਇੱਕ ਨੂੰ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ ਹੈ। ਹਵਾਬਾਜ਼ੀ ਕੰਪਨੀ ਸਕੂਟ ਨੇ ਕਿਹਾ ਕਿ ਸ਼ੁੱਕਰਵਾਰ ਸਵੇਰੇ ਜਦੋਂ ਜਹਾਜ਼ ਗੁਆਂਗਜ਼ੂ ਪਹੁੰਚਣ ਰਿਹਾ ਸੀ ਤਾਂ ਅਜਿਹਾ ਹੋਇਆ। ਕੰਪਨੀ ਨੇ ਕਿਹਾ ਕਿ ਬੋਇੰਗ 787-9 ਡਰੀਮਲਾਈਨਰ ਜਹਾਜ਼ ਸਥਾਨਕ ਸਮੇਂ ਅਨੁਸਾਰ ਸਵੇਰੇ 9.10 ਵਜੇ ਆਪਣੀ ਮੰਜ਼ਲ ’ਤੇ ਉਤਰਿਆ। ਇਸ ਨੇ ਸਿੰਗਾਪੁਰ ਤੋਂ ਸਵੇਰੇ 5.45 ਵਜੇ ਉਡਾਣ ਭਰੀ।
ਸਕੂਟ ਨੇ ਕਿਹਾ, ‘ਗੁਆਂਗਜ਼ੂ ਪਹੁੰਚਣ ’ਤੇ ਚਾਰ ਯਾਤਰੀਆਂ ਅਤੇ ਜਹਾਜ਼ ਅਮਲੇ ਦੇ ਤਿੰਨ ਮੈਂਬਰਾਂ ਦੇ ਜ਼ਖ਼ਮੀ ਹੋਣ ਦੀ ਰਿਪੋਰਟ ਹੈ, ਜਿਨ੍ਹਾਂ ਵਿੱਚੋਂ ਇੱਕ ਨੂੰ ਇਲਾਜ ਲਈ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ।’ -ਪੀਟੀਆਈ